經濟通新聞
《小傳日記》五一之後春江鴨偷步進場,到今日終於揭盅,人行、中證監同金監總局又一次聯合開會,以降準減息為頭炮再公布一連串政策,恒指今朝高開500點有多,但隨後就無以為繼,春江鴨悄悄來又悄悄去矣。
今朝合共出咗十大政策,先嚟降準50點子。對上一次降準都要數到上年國慶前,同上一樣 一降就係50點子,放水過萬億銀流動性,部分汽車金融公司嘅存準率更加會降到0。減息方面就減10點子,LPR會同步減10點子。
行業板塊方面都有著墨,而且都有數字式政策;樓市方面個人住房公積金貸款利率有所下降,五年期以上首套房利率減25點子;科創方面增加3000億銀技術改造再貸款額度;消費方面設立5000億銀服務消費與養老再貸款;中小企方面增加支農支小再貸款額度3000億銀;股市方面將證券、基金、保險公司互換便利5000億元銀和股票回購增持再貸款3000億銀額度合併使用,總額度8000億銀。
孖屐想睇數字,結果就真係有好多數字,但細心留意就會發現好多都只係加大額度,而且係加大貸款額度,即係「姜太公釣魚--願『借』上釣」,唔借就等於無受惠,而且都只係借,最終都係要還,同孖屐預期嘅「無償現金式放水」都係有出入。所以恒指今朝高開500點踢到上23200之後,就一路回吐返,收市差啲升幅不保,以全日最低位收市。
恒指由低位19300反彈至今都成個月,高低波幅成3900點,有無得一舉衝得咁高實在難講,今個禮拜仲有兩日,之後就睇下中美瑞士之約有咩好料,如果趁呢兩日回吐吓,話唔定下個星期返嚟有得炒吓呢。如果呢兩日唔回,下星期就危險啲喇,請請!
*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
上一篇
下一篇
