《小傳日記》小米MiMo面世,AI大模型百花齊放定戰國時代?

　　《小傳日記》正當國家主席習近平南下視察上海,重點調研上海人工智能(AI)產業情況,並要求上海力爭喺AI發展和治理方面走在前列,加快建成具有全球影響力嘅科技創新高地之時。小米(01810-HK)正式推出開源大模型「Xiaomi　MiMo」,成為AI大模型發展生力軍。據介紹小米大模型喺數學推理和程式碼競賽公開測評集上,MiMo僅用7B嘅參數規模,超越OpenAI嘅閉源推理模型o1-mini和阿里Qwen嘅開源推理模型QwQ-32B-Preview。至此,內地AI大模型再添一員猛將。(題外話,MiMo個名真係改得麻麻哋,咪咪摸摸即係慢吞吞嘅意思,喺呢個大數據時代,點可以咪咪摸摸迎戰AI大模型對手?)

　　自從年初DeepSeek以驚天地泣鬼神姿態面世,震驚世界科技及財經界,連世界政壇都為之側目。自此,內地AI大模型發展更加一日千里,百花齊放。通義千問、文心一言幾次升

級,間間公司都雄心壯志,希望隨時彎道超車。企業間競爭激烈,AI大模型嘅排名榜亦瞬息萬變。年初大出風頭嘅DeepSeek,喺1月份AI大模型平台「綜合實力排行榜」高居榜首,亞軍係豆包大模型,通義千問緊隨其後,百度嘅文心大模型排第四,排第五嘅係訊飛星火。

　　但短短兩個月後,五強位置除咗文心大模型仍然穩守第四之外,其他排名全部大執位。喺3月份AI大模型平台「綜合實力排行榜」,通義千問已經從後趕上,取代1月份大熱嘅DeepSeek成為龍頭老大,原本1月份僅排第六嘅混元大模型亦以迅雷不及掩耳姿態,進佔亞軍位置。而年頭獨領風騷嘅DeepSeek急退至第三,只有文心大模型仍然緊守第四位。而1月份亞軍豆包意外跌出四強,僅排第五位。可想而知,內地AI大模型嘅競爭激烈之程度。而呢個都只係綜合實力排行榜,如果再比較初創潛力榜、大模型應用等等其他排名,就更加七國咁亂,當你仲未記得今個月排名時,下個月早已面目全非。

　　除咗上述知名大模型之外,內地舊年總數有約八十幾家發展緊AI大模型嘅企業。有一定實力同知名度嘅包括智譜AI、360智腦、崑崙萬維、商湯科技、騰訊元寶、階躍星辰、月之暗

面、Minimax、無問芯穹等。或者有人會擔心,大家一窩蜂搞AI大模型,會不會出現供應過剩,甚至出現累似千禧年科網泡沫?

　　呢個問題真係好難答,事關科技年代,發展日新月異,大家都係摸住石頭過河,最終邊幾間可以成功跑出,暫時無人知。當然,科企龍頭有財力、有技術,跑出嘅機會自然大啲。但又唔等

於其他對手無反勝機會。事關年初DeepSeek正正係以低成本、低質量晶片,成功挑戰OPEN　AI投入巨大資金和技術砌出來嘅大模型。

　　至於類似千禧年科網泡沫爆破出現嘅機會更加細,事關當年爆破嘅主因係科網股被過分炒作。當年只要同「DOT　COM」扯上關係,股價隨時升天。而目前AI大模型除咗幾間科技龍頭參與其中外,其餘AI大模型初創企業多數仲未上市。而幾間上市科企龍頭股價亦唔見升到失理智。所以,AI大模型爆破機會幾乎不存在。而家有咁多間企業同時做緊AI大模型,可以話係百花齊放,但同行之間競爭激烈程度又好似戰國時代。至於將來,邊個可以留低,邊個被淘汰,就請拭目以待。請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。