《小傳日記》美日談判未講掂數,連送份禮都知有排傾?
經濟通新聞
《小傳日記》侵侵用高關稅嚟脅迫各國直接對談,雖然神州一直企硬,但有唔少親美或者係買佢怕嘅國家都已經急急腳派人走到去白宮門口同佢傾。其中最親嘅櫻花國獲得最優先談判權,只不過早幾日經濟再生擔當相赤澤亮同侵侵見面,未有咩成果,隨後首相石破茂親自去侵侵,結果都係無功而返,更講明櫻花國唔會一味讓步。
唔少意見都覺得侵侵嘅超高關稅都只係爭取談判籌碼嘅手段,到最後侵侵就會宣布將呢批國家嘅關稅減到10%。與其話係談判,身為商人嘅侵侵更著重「傾生意」,「賣嘢」先係佢真正所想。為穩定經濟,外界揣測侵侵係想要求國家加大進口花旗國產品之外,亦想佢哋可以增持美債。據講櫻花國已經準備咗進口大米同大豆作為籌碼,但可能都未及侵侵心意。
外界估計花旗國自然最關心日圓會唔會繼續貶值啦,雖然櫻花國近年先走出負利率政策,但偏弱日圓始終係政府取向,咁先有利出口以及旅遊等等經濟命脈。侵侵以前曾經講話日本的匯率讓花旗國陷入貿易競爭劣勢,但日前貝森特提到,同櫻花國嘅雙邊貿易談判中並無考慮到具體匯率目標,又再次令日圓急彈。
呢排大阪搞緊世博,當然唔少得招商引資嘅預期。日前赤澤亮去花旗國同侵侵傾數,亦都帶同一隻金色特別版嘅吉祥物「脈脈」錢罌,呢份禮物都相當有趣。先講講侵侵嘅回禮,係一頂印有「Make America Great Again」slogan嘅紅色cap帽,唔使多講紅色帽係侵侵嘅象徵,再加埋標明大題「MAGA」,足以表明立場。日本方面大阪世博如火如荼,送吉祥物借意宣傳都係正常,但有趣在「脈脈」咁多吉祥物,偏偏要揀一隻錢罌,可能係貪大隻夠搶眼,但約你傾生意你又送錢罌,如果外交禮物係用嚟表明立場,係咁「錢罌」就係想儲錢啦。一個話「我要賺錢」,一個話「我想慳錢」,可能送禮一刻就已經注定唔啱channel。但換個角度睇,咁咪有得傾囉,慢慢傾,有排傾囉,請請!
*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議
及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
- 檳城漲勢吸金,資金正悄悄進場中
- 掌握全球財經資訊點我下載APP
文章標籤
上一篇
下一篇