《小傳日記》又一華潤系駕到!市況急凍先嚟招股咁輸蝕?

　　《小傳日記》阿爺對股市調控未完,繼之前兩次記者會大潑冷水之後,今日再有《彭博》吹風,可能已經開始對超級富豪徵收海外投資收益稅,稅率甚或可能兩成,搞到恒指下晝愈跌愈有,最多跌過900幾點!而喺呢期日日都大盤冷水期間,魚缸又有涼浸浸嘅冰水嚟到,講緊就係隻華潤飲料(02460-HK)。

　　華潤飲料最大業務就係賣水,最大牌子就係怡寶,當然就係藍籌水股農夫山泉嘅其中一個最大對手。潤飲要上市其實都吹咗大半年,今日起終於正式招股,計劃發售3.48億股,招股價介乎13.5銀至14.5銀,集資最多50.43億銀,會係繼美的之後今年以來第二大集資規摸嘅新股。

　　終於正式上市,雖然同美的(00300-HK)一樣大隻新股,仲要係國企背景,但美的係9月17號上市,食正國慶前政策車輪轉嘅快車,唔使破發之餘仲最高炒過上101銀,升幅差唔多八成半。但潤飲如無意外就會喺下星期三(23號)正式掛牌,但如今政策面上已經風向急轉,潤飲上市之後有無美的咁嘅盛況真係難講。

　　再睇埋基本面,潤飲係包裝飲用水企業入面市佔第二,2023年就佔市場份額18.4%,講得衰就係二奶命排喺農夫山泉後面。雖然話賣水係「大自然搬運工」,近乎無本生利,但農夫山泉頭頭碰著黑境況,大家有目共睹,賣水都有減價戰,轉賣冰又要減價戰,仲未計是是非非,都難免孖屐對於水股有畏懼。

　　講到尾潤飲最大賣點就係國企,但賣水行業竟然都波動到可以好個市咁,值唔值抽真係一半半,而且風雨飄搖之際,有幾多錢會去抽新股呢?國企都係咁話啦,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。