《小傳日記》有色板塊飛漲!銅價今年仲會繼續炒上?

　　《小傳日記》恒指今日(20日)再高見19700水平,再創今年新高,不過高位爭持力度都愈來愈明顯,成交大但升幅細,雖然每日仲有得升啲,但都難免令人開始擔心回吐風險。

　　同樣今日魚缸最熱炒嘅金屬板塊,都一樣高處未算高。以往黃金有獨特因素所以會有唔同走勢,但今趟升浪以來,黃金在內嘅貴金屬同一般金屬都係全面咁炒高;魚缸今日包括紫金(02899-HK)、宏橋(01378-HK)同有色礦業(01258-HK)盤中都創下歷史新高,而呢一波走勢都係有2月開始至今。

　　今年以來除咗炒減息,中東地緣局勢都一樣係刺激資源價格上升。以往黃金都係最直接受到刺激,但今次就連同其他金屬價格都一齊炒高,其中最熱熾就係銅。2月起計,LME期銅已經由每噸8100美金升到至今最高見過每噸11000美金,升幅高達三成半。

　　有評論就估計,銅價升得咁急主要係因為挾淡倉熱潮,因為今年以來銅產量都的確少咗,加速咗挾淡倉嘅氣氛。聯合國旗下國際銅研究小組4月底發表報告,預計今年全球銅礦產量可能按年只會增加0.5%去到2250萬噸,比起10月預估嘅按年增3.7%大幅減少,主要因為個別礦業公司量產開採項目慢過預期,影響今年銅產量,要去到2025年先會恢復年增3.9%嘅增速。既然係咁,要炒銅就要趁今年,亦都解釋到點解呢幾個月銅價爆得咁勁。因為銅都位處工業上游嘅大宗商品類別,當銅價飛天對於下游產業負擔都大咗好多,包括汽車、電子零件等等,而且銅都係製造子彈嘅主要材料,中東戰事不斷都加劇咗銅價飛升嘅基礎。

　　假如戰事真係刺激銅價飛升嘅一大要因,即係未來呢個因素仲存在,銅價都好難會出現大幅回調,商品都好可能會繼續係今年餘下時間嘅關鍵詞,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。