《小傳日記》百度公關主管自掀公關危機!全因霸總人設太離地?

　　《小傳日記》商湯(00020-HK)發布新版AI日日新之後,日日係咁升,風頭直頭冚過最先出「中國版ChatGPT」嘅百度(09888-HK)。不過呢兩日百度都唔弱,居然用一場「關公」嚟搶鏡,事緣百度副總璩靜嘅鐵腕管治「偉論」震驚網民,台媒就大肆報道抽水,話百度股價因而蒸發300億台幣,實際上就係百度ADS跌咗2%多啲。

　　不過璩副總嘅一番說話著實係震撼萬千打工仔嘅心,璩靜係百度公關部大佬,部門最新一項策略就係,公關部全員人人都要開個抖音號拍短視頻,上至璩靜都無一例外,如果唔拍就有可能影響appraisal,據講已經有人因為打死唔拍而寧願劈炮唔撈。不過璩副總身為阿頭,就趁五一期間連出四條片,大談自己嘅管治風格,為自己塑造「女霸總」嘅形象。

　　不過「勞動節」期間宣傳「鐵腕管治」真係唔係一個明智選擇,璩副總四條片入面都係類似剪輯訪問片出嚟,入面金句連連,花生滿滿,完全滿足爭流量嘅要求,但偏偏係「負皮」嘅流量。其中第一條片標題係《員工鬧分手提離職我秒批》,第一句就講:「我為甚麼要考慮員工的家庭?我又不是她婆婆,我主要考慮的是他能不能在他的崗位,及時給我交付結果」盡顯麻辣管理手段,跟著又講到「而且我根本沒有義務去了解你哭了還是沒哭,吵架沒吵,這不是我作為主管該關心的事情,我不是你婆婆也不是你媽,我只關心這個結果,我們的關係就是僱傭關係」,句句都刺中正係放假嘅打工仔嘅心,網絡輿論普遍都認為璩靜睇法過於冷血,對於下屬太過冷漠。

　　幾段片瘋傳幾日,去到今日凌晨璩靜終於跪低,將新抖音號嘅四條片剷曬,只係留低一篇道歉聲明,為呢幾日引起嘅風波「誠懇道歉」,會「深刻反思」同「虛心接受」,佢解釋話拍短視頻嘅初心係想將工作做好,但因為心急而用錯方法,會認真改進個人溝通方式同管理方式,會「更關心同事」。

　　結果原本嘅公關活動變成「關公危機」,對於身為公關部阿頭嘅璩靜真係捉蟲。其實自從東方甄選(01797-HK)嘅「孫董之戰」就可以知道「霸總」人設喺上面根本唔吃香,普遍網絡氛圍都係受軟唔受硬,硬係要喺芸芸「親民老闆」入面突圍做「霸總」,喺公關手段上絕對係兵行險著。一個孫東旭,一個璩靜,「霸總」人設睇嚟喺神州輿情入面通常都無乜好下場,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。