《小傳日記》蜜雪冰城強勢攻港!中企爭開檔,港企難抵擋?

　　《小傳日記》政府積極推廣夜繽紛活動,最新廟街夜市開幕無耐就出現打鬥事件,仲被人揶揄「今次真係夜繽紛囉」。不過,事實上香港某部分都係繽紛咗,起碼多咗間奶茶檔叫蜜雪冰城。

　　之前傳緊會來本地魚缸敲鑼嘅蜜雪冰城,結果開舖仲快過上市,喺旺角「最旺嗰個角」開香港第一間分店,被傳係為IPO試驗水溫。前日(18日)正式喺旺角港鐵站E2出口對開舖位開幕,話明係「最旺角」舖位,每月租金盛惠20萬銀。

　　蜜雪冰城喺神州奶茶舖分級係屬於最低端位置,每杯飲品售價幾蚊人仔,最貴都唔過十蚊人仔,非常之經濟實惠,通常都係學生幫襯為主。不過落到來香港,租個咁貴嘅舖位,唔多唔少都要反映呎售價上面。睇睇menu,普遍各款飲品都比起神州分店嘅貨要貴一個doub,最貴一杯楊枝甘露賣20蚊港紙,深圳一杯只係賣10蚊人仔。

　　雖然貴咗咁多,不過作為攻港第一炮,蜜雪冰城都吸引到大批中學生幫襯。前日開幕兼夾假期前夕,就快放聖誕假嘅中學生都即刻去飲頭啖湯,門口大排長龍入面有九成都係中學生。莫講話Facebook,如今00後嘅中學生已經只係用抖音,據講有唔少同學喺抖音見到就放學衝去買。第一日開幕咁受歡迎,相信蜜雪冰城好快就會見到「最旺舖」嘅實力,不過係咪值回票價就要睇蜜雪冰城嘅實力。

　　唔只蜜雪冰城,近期有唔少神州上市餐飲企業都攻港,包括呷哺呷哺(00520)同旗下下湊湊火鍋、九毛九(09922)旗下太二酸菜魚,甚至係之前敗走嘅喜茶都重新落來開舖。

呢個下半年咁「繽紛」,可能都同港人北上消費熱潮有關,神州企業見到港人喺深圳嘅熱度,自然見到香港市場嘅商機,索性落來開檔,關都唔使你過。假如神州企業已經開始過埋深圳河,夜晚再繽紛都唔知繽紛著誰人個袋,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。