《小傳日記》碧桂園步入危急存亡之秋!仲有無得救?

　　《小傳日記》「碧桂園,給你一個五星級的家」呢句口號,早喺碧桂園(02007)2007年上市之前,就經常喺香港嘅電視不斷洗腦式咁播,街頭巷尾個個都識講,甚至細個真係以為碧桂園起嘅樓真係五星級。

　　不過到今時今日,幫襯碧桂園都唔求要「五星級的家」,交到個家出來都已經還得神落。短短兩星期,碧桂園嘅情況急轉直下,7月31號朝早,碧桂園發布咗一條唔exactly係盈警嘅通告,話今年中期有可能錄得未經審核淨虧損,但就無講明虧損幾多。之後一日,就開始周圍有報道提到,原來碧桂園打算以每股1.3銀配售18億股新股,籌23.4億銀,不過居然臨門撻Q,最終配唔成股,當時都有好多孖屐中人估計碧桂園點解會配唔成股,其中碧桂園就回應話「由於各方溝通不盡一致」,而真正原因就無人知道。

　　自嗰日開始,關於碧桂園嘅傳聞就開始爆發。8月7號,有傳碧桂園根據地佛山,市政府已經派人進駐碧桂園,不過碧桂園方面都係否認。期間碧桂園好多隻債出現急跌,股債雙殺。去到8號,有外電報道碧桂園正式承認遇到「階段性流動壓力」,同一日內媒《澎湃》報道,碧桂園有兩筆新加坡嘅離岸美元債債息逾期未付,規模達到10億美金,連官方都承認,所以由呢日開始碧桂園股價都開始急跌。

　　期間主席楊惠妍動作多多,包括將20億銀所持嘅碧服(06098)捐去家族慈善機構,就連瑞信分析師都話呢個舉動唔尋常。再之後,楊惠妍不斷退任旗下多間子公司嘅董事長職位,亦都正式公布今年中最多有可能要蝕550億銀人仔,而中證監今日同房企開會都無邀請碧桂園去。同時,今日就有傳碧桂園已經準備債務重組,而股價都正式跌穿1蚊大關,最低8毫9,收9毫8。

　　由此見得碧桂園亦都進入危急存亡之秋,加上碧服提早派股息,同埋楊惠妍捐股份嘅種種套現行動,都係好唔尋常,所以真係千祈要小心,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。