《小傳日記》配股都有得撻Q!碧桂園同「各方」有拗撬?

　　《小傳日記》港股衝高上20000之後,阿爺方面都無乜更新,都仲係得幾個方針,所以都令唔少人要睇多陣先,結果今日成交就好夠,不過就係20000點附近爭持。

　　早幾日內房就係大牛股,不過一日天一日地,噚日開始就一路回吐。其中碧桂園(02007)連跌兩日,累計差唔多跌一成半,差唔多無曬早幾日嘅升幅。今朝《路透》旗下《IFR》就報,話碧桂園原定計劃以每股1.3銀配18億股新股,籌旗23.4億銀,不過就臨門一腳取消。

　　到晏畫碧桂園先出通告話,對於於有媒體報道有關建議配股消息,公司方面今日為止就無就建議交易訂立最終協議,而現階段都唔考慮建議交易。

　　據講今次係搵咗摩通做獨家整體協調人同帳簿管理人,內媒《澎湃》就報道,碧桂園內部人員就話,面對市場同銷售嘅不確定性,會密切留意能夠拓展多元化融資渠道嘅市場窗口期,又會積極同各中介機構商討融資方案。不過單計今次,就「由於各方溝通不盡一致」,所以就無就建議交易訂立最終協議。

　　「由於各方溝通不盡一致」呢一句係正式通告入面無嘅。究竟係同邊個溝通唔一致,邊個係原先今次嘅承配人都無報道提過。但係早一日碧桂園先啱啱出完盈警,會唔會係傾配股時未出盈警,傾完先見到有盈警所以縮沙呢?都唔肯定,反正今次就肯定衰咗。但係去年今日嘅碧桂園都連續配咗兩、三次股,到今日為止股價都未升返,要呢個位再幫佢手配股都係好博,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。