《小傳日記》阿爺出大絕規管人工智能,其實唔使咁頻能?

　　《小傳日記》AI概念炒得㷫烚烚,阿爺好幾次潑水降溫都唔成功,就喺泰國潑水節過咗無耐,阿爺終於出大招潑大盆水,經網信辦發布《生成式人工智能服務管理辦法(徵求意見稿)》,AI概念即時急凍!

　　今日中午網信辦發布《徵求意見稿》,其中首先提到,人工智能生成內容應當體現社會主義核心價值觀,不得含有顛覆國家政權等等;其次,人工智能產品或服務應當尊重知識產權、商業道德,不得利用算法、數據、平台等優勢實施不公平競爭。

　　另外,其中提到比較重要一點,就係提供生成式人工智能服務應當按照《中華人民共和國網絡安全法》規定,要求用戶提供真實身份信息。提供者應當明確並公開其服務的適用人群、場合

、用途,採取適當措施防範用戶過分依賴或沉迷生成內容。呢一點對於實際應用上影響比較大,即係用「文心一言」嗰陣係實名制,變相搜尋過乜嘢係有機會有record,即係唔可以亂用。另外,「採取適當措施防範用戶過分依賴或沉迷生成內容」呢一點亦都可圈可點,點樣過份依賴或者沉迷暫時無好清晰介定,呢一點對於之前靠AI製圖跑出嘅美圖(01357)都好有影響。

　　雖然網信辦一錘定音,不過有時一早講明點規管,好過搞咗一排先出。而家趁各大AI概念公司出新平台之際講明框架,亦都有框架可以跟,同時亦都可以趕絕做唔到以上要求嘅外國GPT開發公司。所以,雖然《徵求意見稿》中午一出之後,商湯(00020)、QQ(00700)都要跌,不過收市前跌幅都有收窄到,而且唔係不斷跌落去,亦都可以見到孖屐對呢幾間AI概念公司有信心,反正商湯、百度(09888)之類都唔會出一個唔合規嘅聊天機械人出嚟,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。