《小傳日記》有線cut線唔做收費電視,轉攻免費電視容唔容易?

　　《小傳日記》長達近30年嘅有線(01097)收費頻道,會喺今年6月1日開始正式「cut線」。本來公司收費電視牌照嘅有效期去到2029年5月31日,但舊年9月30日已經去信商經局同通訊局長提出停播申請。終於,行政長官會同行會批准終止相關服務牌照。

　　想當年有線電視收費頻道大行其道,尤其係體育方面,足球、排球、羽毛球等賽事包羅萬有,娛樂台嘅節目製作亦非常出色。不過,集團自2008年開始蝕錢,2015年中期虧損擴大到1.21億銀,股權易手後情況無改善,加上「現代台」喺收費電視業務急起直追,對有線電視造成非常大嘅衝擊。有線CEO黃思遠話,公司收費電視客戶由100萬人跌到依家嘅68萬人,觀眾更依賴網絡內容,全球收費電視服務經營好困難,交還牌照純粹是商業決定。

　　無咗收費頻道嘅有線,未來會轉攻免費電視,仲打算開拍電視劇。但係,無線(00511)喺免費電視市場雄霸咗幾十年,加埋ViuTV嘅強烈競爭,再睇番有線部分開拍咗嘅節目收視麻麻,例如選秀節目《就是青春》試過只有0.1點收視,轉換番得6500位觀眾收睇,能唔能夠喺收費電視創出另一個天地,確實有疑問。

　　今日有線股價高開四成五,但之後升幅大幅收窄,日線圖睇見到一支超大嘅陰燭。到底有線未來嘅免費電視業務可以大展鴻圖,定係好似今日股價走勢咁一閃即逝呢?請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。