《小傳日記》天口凍冰冰,火鍋舖㷫烚烚,個價炒起要睇實!

　　《小傳日記》魚缸悶咗幾日,今日終於有啲料到。阿爺開會期間就提到要支持民企同平台經濟發展,繼續促進金融16條運作。一提到「民企」、「平台經濟」同「金融16條」呢啲孖屐最鍾意嘅key　words,魚缸即刻彈返500點左右畀你睇!

　　今日最當炒就係消費股,落後咗咁耐,今日食住個勢終於跑出,體品、餐飲、食品等等全線上升!有上面行家就即時跟進咗餐廳旺場嘅盛況;北京啱啱恢復堂食,呷哺呷哺(00520)

喺朝陽區一間分店嗌飛由朝嗌到晚,一個周末就做咗10萬銀人仔數,總共成1000個客,奶茶都賣咗500杯!所以呷哺都食住個勢,大派5億銀人仔現金券,充值消費仲買幾多送幾多!

　　海底撈(06862)都唔輸蝕,由12月16號開始恢復免核酸堂食以來,近一星期客量按周升返五成有多。海底撈負責人就提到,近期北京門市持續回暖,預計未來兩個禮拜會愈做愈

旺,尤其可以趕得返聖誕節、元旦呢啲節日高峰期,仲要唔只門市,連外賣生意都可以做返起!

　　仲傳緊過咗新曆新年上面就會放寬到「0+3」,真係放寬對消費股就更加有利,加埋冬天係傳統火鍋股旺季,睇嚟真係有機會分一杯羹,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。