《小傳日記》留意防疫關鍵詞,捉實風向好easy!

　　《小傳日記》魚缸今個星期都算來回又折返,由16800反彈2000幾點,衝破19000,今日又回返落嚟,都算幾動魄驚心,當然都多得阿爺鬆口放寬防疫啦。

　　雖然官方言論最緊要,不過官媒嘅論調就更加令人睇得到風向嘅轉變。之前衛健委開記招就提到即使地方要封控,都要「快封快解、應解盡解」嚟減低對人民嘅影響。噚晚新華社就連發三篇評論吹響「快封快解」呢支歌。

　　其中一篇就直接以《快封快解、應解盡解》為題,當中講到封控要堅持以科學精準防疫,有助社會高效統籌防疫,而「快封快解」強調一個「快」字,發現疫情苗頭就要盡快行動,將疫情預先控制,為「快解」創造條件,盡量將影響降到最低。另外兩篇主要就係針對染疫高風險群組,即係一老一幼及長期病患者等,要特別多加照顧,以及提到要全民小心謹慎同互相配合先可以將防疫做得成功。

　　而喺上面宣布「快封快解、應解盡解」之後,有唔少地方嘅封控力度都明顯下降咗,所以呢一兩日都少見咗有關行動嘅報道,未來可以預計得到防疫方向一定係精準化,封控嘅範圍同時間都會縮減,影響就可以減少。

　　雖然見到神州每日確診人數不斷上升,但係相信阿爺開始鬆口之前已經評估咗,放寬之後確診人數上升速度一定會係可控範圍內,只要個數唔係暴增,相信防疫力度唔會即刻再收緊,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。