《小傳日記》神州防疫似緊還鬆，魚缸萬八繼續衝！

　　《小傳日記》阿爺又再出招救內房！孖屐就稱之為「第三支箭」，今次內容最主要就係容許內房再融資，可以用自有資產作抵押，最多仲可以按五成！雖然只限用於保交樓，不過有得按又多一條水路，所以今日又再炒多轉內房囉！

　　內房帶動魚缸炒高，不過期間就再傳，衛健委晏晝開記招，疑似會宣布進一步放寬，所以爭持激烈之下恒指進一步突破18000點大關。不過開始記招之後都係無乜大招出嚟，所以都一

度要試返落去。後尾招數慢慢出嚟，其中就提到，喺疫情傳播風險不明確或者存在廣泛社區傳播的情況下，可適度擴大高風險區域劃定範圍，但係就要及時通過核酸篩查和疫情研判，快封快解，最大限度降低因疫情給群眾帶來的不便。

　　國家疾控局監督一司司長程有全又話，長期封控影響人民正常生活，呢種情況必須糾偏和避免，未來各地要進一步加強高低風險區劃分標準培訓，組織做好風險區域劃定同管理，原則上高風險區一般以單元、樓棟為單位劃定，不得隨意擴大。

　　雖然阿爺方面口脗都係堅持防疫至上，不過由上面提到嘅嚟睇都係樂觀好多，所以恒指都即刻有反應，收市前半個鐘突發抽升，由升啱啱700點，一路飆上去800幾點，最終收市競價結束之後，計埋啱啱好升夠906點，收報18204點。不過睇返恒指牛熊街貨分布，18100以上就係上日熊證最重貨區位置，所以今日剛剛好殺清重貨區，之後仲會唔會再下一城就唔知喇，不過再上嘅熊證區域都仲有唔少肥熊，18500以上100點都有700幾張，再試上都唔係無可能，請請！

＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議

及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。