《小傳日記》危急存亡之秋，四太瀟灑話放手就放手！

　　《小傳日記》魚缸試咗兩日１８０００之後，未有北水之下都係無乜力，結果今日都係要掉頭向下，再向１７０００邁進。

　　自６個賭牌７間爭開始，濠江又再掀起連番暗湧，雖然孖屐都預期，馬交政府照計都會畀返現有嘅６大賭場，不過唔怕一萬，至怕萬一，本身坐定粒六到而家多隻香爐多隻鬼，始終都唔係包生仔。

　　呢個時候澳博（００８８０）就有郁動，繼早前澳博主要附屬公司澳娛綜合董事局決定委任二房嘅何超鳳做公司常務董事，替換原任四太梁安琪後，最新文件顯示，四太禮拜日（２號）將手上澳娛綜合嘅１０％或３萬Ｂ組股份易手予何超鳳，總作價只有象徵式１澳門元。同時何超鳳將出任澳娛綜合常務董事，四太同四房何猷亨就退出董事會，新增霍啟山入局。

　　雖然名義上叫賣股，但實際上已經係直接畀股份。雖然外界睇落唔同房係各不相干，但係重要時刻都係槍口一致對外。雖然６個賭牌估計都係會畀返原本６間賭企，但係都有啲大行最睇淡澳博，如果要ｆｏｕｌ一間就會係澳博。所以危急存亡之秋，四太肯下放權力畀二房超鳳幫手爭牌都可以明白，而今次轉讓，亦可以理解為賭牌持牌人由四太轉為超鳳。

　　爭牌事關重大，一早已經係澳博主席嘅超鳳今次可以更加坐正，用持牌人身份爭賭牌，做起上來應該更加得心應手，咁爭到機會又大返啲喇，請請！

＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議

及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。