《小傳日記》傳神州叫停車貸返佣,車企減價戰仲打得郁嗎?

　　《小傳日記》車企打到腥風血雨一片,周末中國工業汽車協會、中國工信部、《人民日報》接連出聲警告車企收斂啲,唔好再打價格戰,今次官方高調出手,似乎真係要撥亂反正?上周五晚,一家知名內媒獨家消息話,據知情人士透露,有國有大行分行接總行通知,6月1號起停止購車分期「高息高返」模式,預計兩個月左右全國多數金融機構都會陸續停止高息高返模式。如果消息屬實,可以話係閂咗價格戰嘅水喉,車企冇彈藥再打。

　　宜家喺神州就算有能力全款買車嘅人都會選擇貸款買車,只因貸款買車有著數,就算加埋利息都甚至比全款買車要平,相當於負利率!銀行為咗搶貸會派優厚佣金,與此同時4S店都會返佣搶客,亦即係神州所講嘅「高息高返」模式,喺銀行、4S店雙重讓利之下,就有可能車貸連本帶利平過原售價囉。

　　舉個例子,你睇中架車,如果畀全款,車價要45萬;但假如你走貸款,分5年還,銷售即刻畀你個筍價,車價平一截落到38萬,銷售仲會同你講,兩年後就可以提前還款,中間唔產生違約金或者手續費。咁計法,假如你貸30萬,年利率係5%,供兩年後提前還清,利息先得3萬,意味著實際車價只要41萬,慳成4萬!

　　同高息高返一樣被圍堵嘅,仲有高息高返嘅combo技--「長貸短還」。正如上文所講,好多人借錢買車唔係畀唔起,只係貪申請車貸有優惠,咁如果還款期短啲咪可以慳多啲利息囉

。唔知係有文件警告定大家心領神會,近期神州多家銀行都上調提前還款門檻,如延長提前還款期限、提高違約金比例等,例如將5年期車貸嘅免違約金期限從「貸滿2年」延長至「貸滿3年」或者將提前還款違約金則由0%調升至5%,借貸買車冇咁著數喇。

　　工薪夾心階層向來係銀行嘅優質貸款客戶,尤其係房貸車貸,所以銀行只係想搶佔車貸市場,意外刺激咗車企減價戰進一步升級。儘管銀行向買車一族提供金融優惠,理應唔會刺激車企「內捲」,反倒係造福全行業,不過過分利用貨幣槓桿造就行業短暫繁榮,始終都唔係咁健康,神州樓爆問題都而家都未解決,前車之鑑,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。