《小傳日記》美國新股王誕生,內地股王可做年份酒,第日賺多啲?

　　《小傳日記》昨日(18日)納指和標普500指數再創新高,筆者已經懶得去記究竟兩個指數今年創咗幾多次新高。除咗兩大指數不斷創新高之外,股王位置近期亦頻頻易手,微軟,蘋果,英偉達就好似玩音樂椅咁輪住坐。上周蘋果市值曾超越微軟,重登股王寶座,噚日又輪到英偉達發威,市值超越微軟,登上美國亦係全球最高市值公司。股王之位,微軟同蘋果都係常客,但後起之秀英偉達今次係首次封王,除咗說明呢隻晶片股王近年炙手可熱之外,亦顯示美國經濟及科技實力之雄厚,以及推陳出新嘅創造能力。

　　美國股王換馬,A股呢邊股王位置卻多年如一,茅台嘅股王地位依然屹立不倒。但股王都唔係無隱憂!據內媒近日報道,上周(13日)原箱飛天茅台53度╱500ml價格為每支2695人仔,比起農曆年(2月中)期間賣3000元,跌咗一成。酒價下跌亦拖累回收商及煙酒店,有二手買賣平台回收商表示,目前唔收茅台,有回收商甚至直言就嚟蝕到執笠。茅台股價近期亦受銷量下跌拖累,5月初至今跌股價累跌逾一成。如果由2021年高位2600幾人仔計,跌到而家剩返約1500人仔,累積跌幅更超過4成。

　　銷量下跌嘅唔止係茅台呢啲高檔酒,就連啤酒呢啲大眾消費得起嘅酒精飲料,今年首季銷量都錄得下跌。關於茅台價量齊跌一事,據聞有「中國股神」之稱嘅段永平喺佢微博號聲稱,如果滯銷嘅產品係電子產品之類嘅嘢,後果會比較嚴重。但茅台賣唔出只是意味住庫存中又多咗一批「年份酒」,日後呢啲「年份酒」可能會賺得更多。係喎,酒愈耐愈醇,自然愈有價值,呢句話似乎有啲道理。不過,按照咁嘅邏輯,以後茅台出產嘅酒,乾脆留起一半或者索性全部唔賣,留返來做「年份酒」,將來賺多啲,使乜等到而家賣唔出先焗住做「年份酒」?

　　其實,內地股王也好,首富也好,好多人一直都有個疑問。作為泱泱大國,點解股王係賣酒嘅,首富係賣水嘅,而唔係好似其他大國咁由晶片、電腦,或者軟件、手機呢啲同科技息息相關

嘅行業領軍?由酒水撐起嘅經濟可以持續幾耐?坦白講,呢類問題真係好難答,只可以話係「國情唔同」!請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。