《小傳日記》繼宗慶后事件後再陷「新三害」,農夫山泉何去何從?

　　《小傳日記》今日有內媒報道,近日鍾睒睒卸任浙江農夫實業發展有限公司法定代表人,郭振卸任經理,新增饒明紅為法定代表人、經理。目前,鍾睒睒仍擔任該公司執行董事。資料顯示,該公司成立於2006年,註冊資本5000萬元人民幣,由農夫山泉股份有限公司全資持股。筆者睇完嚇咗一跳,以為講嘅係港股上市嘅農夫山泉有限公司(09633-HK)。雖然只是關聯企業,但呢個時候任何變動都變得十分敏感。之所以咁緊張,係因為近期農夫山泉是非不斷。所謂一波未平一波又起,農夫山泉繼早前因為宗慶后離世,被推挖出當年兩人之間嘅交集,而被網上抵制後,近日再陷「新三害」嘅漩渦。

*網上傳出新三害*

　　所謂「新三害」,係指莫言、清華大學和農夫山泉。先喺上月底,有網民在微博上貼出針對諾貝爾文學獎得主莫言嘅訴訟書,指佢喺包括《紅高粱》等作品中醜化「八路軍」、「侮辱革命

先烈」及涉嫌詆毀領導人、抹黑中國人民等,要求莫言向中國人民道歉及賠償每人一元共15億名譽損失費。

　　清華大學其後也成為圍攻對象,理由是美國政府早前制裁了包括「國防七子」在內嘅多所中國大學,但制裁名單中不包括清華,因此成為第二害」。

　　而「第三害」則為中國飲料業巨頭農夫山泉。有網民指農夫山泉嘅一款產品包裝採用「日本元素」。例如「茶　」嘅名稱和包裝圖案與靖國神社嘅某些元素相近,「東方樹葉」包裝印有類似日本五重塔嘅圖案,質疑農夫山泉涉及媚日宣傳。

*網上現抵制,旗艦店受影響*

　　儘管農夫山泉已經就各種傳言作出澄清,但網上抵制未有平息嘅跡象。自2月底起,網上便傳出抵制農夫山泉嘅聲音。至3月8日,農夫山泉抖音官方旗艦店已7天未開播,帶貨達人數量

降逾80%,農夫山泉旗艦店銷售額從2月27日單日銷售額100萬元人民幣,急跌至3月8日只有2.5萬元人民幣。雖然講嘅只係旗艦店,但跌幅之大令人咋舌。難得嘅係,股價近期大致上變化唔算好大。3月初雖有下調,但跌幅唔算誇張,感覺唔到太強嘅「沽」味。

　　呢個時候,傳來鍾睒睒卸任浙江農夫實業發展有限公司法定代表,係巧合?定係部署一步步退下,為農夫山泉卸除包袱?咁就不得而知了。網上嘅情緒化行動對企業嘅衝擊有幾大?暫時未知,但目前風頭火勢下,投資者最好做好風險管理。至於股價何去何從,仲要拭目以待。

　　踏入龍年,鍾老已經是非纏身,睇嚟係流年不利。可惜筆者唔識鍾老呢D大人物,唔係就建議佢上個禮拜嚟香港自由行。皆因3月5號,係傳統二十四節氣嘅驚蟄,香港灣仔鵝頸橋有傳統嘅打小人活動,話唔知定打完就可以遠離是非呢。(vs)

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。