《小傳日記》李寧22億買總部!充大頭鬼不如回購仲好?

　　《小傳日記》魚缸終於都失守16000,好在今日收市前就企得穩,但都要睇多兩日係咪真係企穩,如果成交繼續咁低,都難保唔會再試落去!

　　不過今日隻李寧(02331)就真係跌到廿蚊都仲有得跌,唔通真係因為太大花筒?李寧噚晚發通告,宣布用22.08億銀向恒地(00012)買入北角樓高22層「港匯東」大廈

全幢,連同5.9億銀承接轉讓銷售貸款。今朝李寧一開就要跌一成一,之後仲試過跌一成六,最終都係要跌一成四,收報18.3銀。

　　如今孖屐都唔睇好樓市,不過李寧就掟22億買樓入市,都好難唔係心口掛住個「勇」字。

雖然通告都講到買嚟係做總部,不過幢樓22層高,李寧自己都應該用唔曬,斷估都應該要租咁啲出去。於是有股民就覺得李寧「不務正業」,終於開始要耍財技來撐業績。市好就話啫,而家市差,李寧搞咁大動作都好難唔令孖屐心寒,畢竟大家都見過逆市擴張嘅海底撈(06862)係點樣撞板,要花幾多時間先由海底撈返上來。

　　李寧由舊年底就開始攻港,不過步伐都未算好快,暫時都係得3間分店,但係就用22億來開總部,睇落都好雄心壯志。不過網民就唔係咁覺得,認為有閒錢不如回購都好過買樓。的確臨近年尾有唔少公司近排都公布增持或者回購嚟托價,李寧已經跌到得20銀,寧願買樓都唔回購,確係令人失望。

　　其實李寧本身都已經非凡領越(00933)間接持有bossini(00592),都已經係好本地嘅業務,但係都仲要咁大陣仗花咁多錢買總部大樓,都似係姿態居多,雖然用唔曬可以放租,但而家租務市場都唔好,租出去有幾多肉食,可能真係得李寧先計到,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。