menu-icon
anue logo
澳洲房產鉅亨號鉅亨買幣
search icon

A股港股

《小傳日記》快餐店輪流放榜,大家樂贏在廣告銳不可當?

經濟通新聞 2023-11-29 16:53


  《小傳日記》11月就快過,連美團(03690)都「寶物」沉歸底出埋業績,連隨恒指都沉歸底鑿穿17000,第三季業績期都即將告一段落,本地兩大龍頭快餐股大家樂(00341)同大快活(00052)都先後出咗截至9月嘅中期業績。

  其中大家樂就係噚日晏晝出,大快活就係今日晏晝,不過大快活放榜之後馬上急插一成一,皆因中期按年少賺一成半得返回3631萬銀,雖然照派11仙息,不過都撐唔住股價。睇返大家樂就高興得多,按年賺多八成四,仲加派五成中期息,每股派15仙。大家樂仲話,如果唔計政府疫情資助,純利按年係勁升三倍。

  話就話大家樂勁賺,都係受惠低基數效應,但如果一樣係基數低,咁大家樂真係跑贏大快活好多。回顧過去呢六個月時間,大家樂宣傳攻勢明顯強得多,一來有做電視廣告,首廣告歌日播夜播,隨時都感覺又上演,仲要一坐入餐廳就可以聽得到。另外,大家樂仲有會員制,儲夠分又可以換嘢,反而大快活雖然都有會員制,但係就無儲分計劃。大家樂業績入面提到,截至9月嘅六個月入面,推廣支出就用咗超過5140萬銀,證明廣告錢係使得其所,相對大快活就無一欄標明廣告開支。

  另外,大家樂同大快活都有經營除咗自己牌頭嘅餐廳,但相對之下大家樂就多好多非「大家樂」嘅餐廳。除咗47間一粥麵都歸類為「速食餐飲業務」之外,大家樂旗下仲有上海姥姥、米線陣、意粉屋同Oliver's Super Sandwiches合共129間門市,相對大快活只有合共10間分別係一碗肉燥、ASAP同一葉小廚,大家樂系明顯人才濟濟得多。


  大快活同大家樂明顯係用緊唔同嘅推廣策略,大快活提到新餐「食得夠GYM」雞胸套餐係「有賴於有效而低成本的線上廣告以及知名KOL的推介」,證明大快活係真係有意換過一個推廣模式,減低依賴線下宣傳,但係喺疫後復甦呢一段時間明顯被大家樂比下去。睇來大快活對於轉型線上推廣方面仲要掙扎一段時間,公司同孖屐都仲需時適應,請請!

 

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。

文章標籤


Empty