《小傳日記》股票印花稅聽日還原,今日質低聽日買多轉?

　　《小傳日記》魚缸噚日(15日)升完差唔多700點之後,今日(16日)都係頂唔住要獲利回吐,唔見返200幾點,好在成交算係少過噚日,得1100億銀多啲,算係沽壓無咁重。

　　尋日立法會就正式三讀通過下調股票交易印花稅,係之前施政報告入面提到,將買賣雙方各畀0.13%嘅印花稅降至0.1%。之前都講到,0.13%係2021年政府因疫情嘅影響而加到0.13%,如今最多只係叫恢復到疫情前水平,談唔上係真正嘅下調。

　　事實上魚缸嘅股票印花稅率已經喺全球數一數二,例如神州減半徵收之後就只係向賣家收0.05%印花稅,而美國更多係無收交易印花稅,所以買港股實際上真係唔抵,仲要唔肯升!而喺2022至2023財年,股票交易印花稅為政府帶來531億銀收入,係全年總收入嘅9%,係政府收入其中一個重要支柱。

　　而呢年以來港股成交額嘅每況愈下大家都有目共睹,800幾億900億已經係常見,低成交嗰排更加係日日700幾億都唔出奇,所以點解港府要咁積極提高成交額,連八號波維持交易都出埋,就係唔想少咗嗰幾日印花稅收入。

　　不過近期港股雖然成交額低,但實際上計埋今日已經係連續19日錄得淨流入,即係真係有錢低位接緊貨,整體未算太悲觀。而聽日正式減印花稅,今日嘅大回吐話唔定都係為聽日用低啲稅率而鋪路,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。