《小傳日記》被傳上市嘅「肥西老母雞」,廿年發展一啲都唔俹簁!

　　《小傳日記》記得好耐好耐以前就上網見過「肥西老母雞」,只要識廣東話嘅一見到呢個名就已經想笑,但都係因為呢個名,大家先知道原來正正經經有個地方叫「肥西」,就係位於「合肥嘅西邊」,喺肥西縣賣老母雞湯嘅就係「肥西老母雞」。

　　咁多年以來周不時都會被香江網民拎出來恥笑,而遠在安徽嘅肥西老母雞好似都知道舖名嘅廣東話音太過令人噴飯,所以就喺2012年改咗名做老鄉雞。而噚日就有傳老鄉雞終於要落香港IPO,以為終於可以落嚟報返以前被笑嘅屈辱,點知傳咗一日就被老鄉雞方面澄清並非事實。

　　但其實老鄉雞要上市都係好有資格。創辦人束從軒由1982年就開始喺肥西養雞,1998年正式開公司賣雞,到2003年就開咗第一間肥西老母雞快餐店,亦正係廣東人一開頭見到舖名嗰一張相。唔知係咪多得廣東人嘅取笑兼宣揚,肥西老母雞用咗兩年就獲得合肥「著名商標」,到2010年已經攞到「中國快餐50強」稱號。

　　隨後因為想進一步走出安徽,為免尷尬就索性改用新朵「老鄉雞」行走江湖,亦開始喺神州各地開設老鄉雞分店。經歷多年打拼,終於成功喺2018年成為「中國快餐70強」嘅榜首,今年6月仲成為神州單品牌門市數量最多嘅中式快餐。

　　咁成功嘅老鄉雞其實上年真係申請過A股上市,當時計劃集資12億人仔,不過當時嘅老鄉雞已到發展樽頸,全年營收逐年升,不過毛利就開始倒退。另外,當時亦都被市場發現,創辦人束氏家族嘅持股量過高,甚至高達九成以上,種種原因都影響咗上市進程,最終到而家為止都未成功喺A股上市。

　　估唔到以前網上嘅陳年meme到今日差少少就上市成功,仲係中式快餐嘅龍頭,喺管理方面自然有一定保證,而當解決到增長樽頸嘅問題,相信喺香港上市都唔係無可能呀,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。