《小傳日記》急跌急升值唔值博?中概寺庫有內幕?

　　《小傳日記》喺美股市場,一啲忽然急升急跌嘅股,就會稱之為meme股,因為就好似meme咁樣無原無故就忽然hit咗。如果以咁嘅定義,魚缸隻馬可數字(01942)都算係meme股,不過大上大落咗差唔多兩個月,到今朝開市前終於停咗牌,到而家未公布消息,唔知有咩內幕呢?

　　而美股嗰邊呢兩日都有隻奇股,就係中概股之一嘅寺庫(US.SECO),前晚已經升咗一成一,到隔晚更加係暴升兩倍有多,不過兩日以來都未有公布咩消息,正好就係一隻meme股。

　　寺庫其實就係神州賣名牌嘅網站,號稱為「神州最大奢侈品網站」,2008年創立,2017年喺納斯達克掛牌集資1.4億美金。不過呢隻股過去一段時間以來「妖味」都相當之

濃;2021年初,寺庫被傳拖欠供應商貨款,到5月開始,連消費者都反映寺庫開始收錢唔發貨。嗰年11月,北京有關部門就以涉嫌違法違規及損害消費者權益對寺庫立案調查。

　　去到上年,寺庫執笠嘅消息愈傳愈旺,股份跌穿1美金,仲多次被申請破產,不過都被寺庫方面否認。時至今日,寺庫仲未執笠,電商網站仲係如常運作,雖然唔知會唔會畀錢唔出貨,不過起碼仲入到。

　　同樣都係賣貴嘢,京東(09618)呢兩日不斷被好多間大行圍剿,唱淡佢主打高價單品,好難喺目前消費信心低落嘅神州孖屐撈起,搞到京東今日暴跌一成一,創回H以來新低。不過時間上就好弔詭,京東呢兩日被唱淡,寺庫就忽然暴升,大家都係電商,兩者會唔會有咩關係呢?不過既然有妖味,就唔好亂咁入手喇,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。