《小傳日記》多鏡頭就影得靚?iPhone　16傳有六粒鏡!

　　《小傳日記》魚缸連升六日!幾耐無見到咁嘅境況,仲係自9月22號以來第一日重上1000億銀成交,真係可喜可賀。

　　魚缸咁升法,低殘股之一嘅舜宇(02382),早排跌到落50.3銀6年半新低之後,終於行過死蔭嘅幽谷反彈,今朝仲高開8巴仙。原來最新公布9月手機鏡頭出貨量按年升咗一成七,車載鏡頭出貨量就多7巴仙有多。不過近期蘋果概念股飆得好勁,好似隻丘鈦(01478)噚日就升咗兩成三,今日隻富智康(02038)就最多升過三成有多,唔通蘋果有咩新嘢?同新傳緊嘅iPhone　16有關呢?科技世界一樣都係貪新忘舊,當然都要「新」好過舊先啦,如果新不如舊就真係嘥氣。不過而家就傳緊,出年登場嘅iPhone　16,有可能係史上最大mon嘅一部,最大部嘅Pro　Max可能會有成6.9吋咁大!16最高規格嗰款機會係叫「Ultra」,不過係Pro　Max改叫「Ultra」,定係喺Pro　Max之上再有一部Ultra都係未知。關於Pro　Max嘅傳聞真係多到飛天,仲有講話16　Pro　Max會變成「鏡頭魔人」,喺而家三個鏡頭嘅側邊仲會多加3個小鏡頭,一共6個鏡頭!都唔知影唔影到咁多,不過可能就係呢個原因而炒起舜宇!年少人換機,講白啲都係低基數效應,6個鏡頭係咪真係吸引到人一年換機,都仲要睇吓係咪真係性能勁好多先得,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。