《小傳日記》Google出片暗瘀蘋果!蘋果睇完會唔會嬲咗?

　　《小傳日記》新iPhone仲有一個星期就出爐,不過今次好似都無乜期待,之前好似有啲新意嘅固態按鍵都取消埋,話因為量產製造會更為複雜,軟體集成問題亦都會更重皮,所以今年嘅iPhone　15就暫時無得用住,不過有《彭博》消息就話出年iPhone　16一定會有返。

喺10月4號緊接發布旗下新機系列Pixel　8。喺自己同最大對手臨出新機之前,Google　Pixel就喺自己個YouTube　channel出咗條新片。段片就係CG動畫,就講到Pixel電話同一部疑似係iPhone嘅電話,一齊喺各自嘅發布日之前去歎spa。「疑似」iPhone就感歎,話而家做發布會都愈來愈難,諗起16年前發布第一款iPhone,單單係可以滑動解鎖就已經贏到全場掌聲,而家做咩都好似好容易被人追過頭咁。

　　Google都乘機sell吓Pixel有咩功能,仲要由「疑似」iPhone把口講出來,話每次自己發布完新功能,都會有其他電話做到啲佢做唔到嘅嘢,包括舊相清晰化、AI接聽未知來電同即時翻譯信息等等。不過「疑似」iPhone就話自己都仲有幾道板斧未出,不過就暗示畀Pixel知將會用type　C叉電口。但係就被Pixel反問「你終於要開始用type　C喇?」暗瘀iPhone到而家先開始跟隊用type　C。

　　雖然有啲串串貢,不過又不失盞鬼。條片到今日為止出咗6日,就已經有成2800幾萬views,唔少comment都非常讚好Pixel同「疑似」iPhone嘅互動,仲話如果有成齣戲都會一家入場支持。唔知蘋果睇完會唔會更加想的起心肝搞好個發布會,又即管睇吓除咗type　C仲可以有咩驚喜!請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。