《小傳日記》美圖AI概念無限憧憬,後市有望挑戰8銀大關!

　　《小傳日記》上星期四(29日)美國公布首季GDP年率化季度增長2%,好過市場預期,第二日公布5月份PCE按年升3.8%,較4月份嘅4.3%大幅放緩,美國加息周期年內結束喇啩?所以美股三大指數齊升,納指仲創埋1983年以來最佳表現嘅上半年,大行高盛認為美國有望避過經濟衰退。另外,美國財長耶倫又將於本月6至9日訪華,令人憧憬美中關係有望改善,當然亦好大可能為民主黨出戰明年大選製造有利環境。點都好,港股今日(3日)開局唔錯,恒指早市已曾升超過300點。

　　近期都係炒番啲AI概股穩定,因為股價要有龐大升幅就一定要靠概念,同有無限想像空間,AI概念就可以做到!今日開盤隻美圖(01357)位居大價股升幅榜首,而且股價一路衝頂,暫時最高見過3.37銀,升幅13.85%。

　　美圖2008年成立,致力打造優秀影像生產力工具,讓影像拍攝、影像後期、設計、繪畫變得更簡單,並通過美業SaaS助力產業數碼化升級。截至2022年12月,美圖公司月活躍用戶總數為2.43億,其中海外月活躍用戶數達7976萬。另外,公司正全面投入AIGC,喺日前嘅第二屆影像節,公布發布咗7款AIGC新品,包括AI圖片、AI視頻、AI設計、AI數碼人等6款工具產品,以及AI視覺大模型MiracleVision。

　　美圖截至去年12月底止,全年營收20.85億人幣,按年增長逾25%,毛利11.87億人幣,按年增長5.5%,每股盈利雖然只有0.02人幣,但已扭轉過去多個季度嘅虧損狀況,前景值得憧憬。走勢上,上星期三股價高見3.55銀後以穿頭破腳大跌,之後兩次試穿2.8銀後都見強勁承接,估計短期突破3.55銀機會極高,下一個挑戰嘅目標為4.5銀。由於股價自2018年8月跌穿4.5銀後,呈現大型橫行,今次如果上破該位,後市有望挑戰8銀阻力,可以訂止蝕位喺2.7銀,現價作第一注追入,第二注2.95銀,升破3.55再追。(pc)

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。