《小傳日記》美國藥物就快彈盡糧絕!FDA話好難解決?

　　《小傳日記》美國聯儲局暫停加息,本來魚缸都一直牛皮,今朝高開200幾點之後都唔係點肯升,點知到下晝先來發力,最多試過升成400幾點,唔知今次企唔企得穩條牛熊線呢?

　　講起美國,原來近期藥物短缺都非常嚴重,早喺上個月,美國衛生系統藥劑師協會數據見得到,已經有超過300種藥物出現短缺,當中有唔少都屬於緊急救命藥,包括癌症化療藥、鉛中

毒藥、搭橋用心臟停搏液等等。有調查話,由於美國藥物供應鏈仲正係受疫情後因素影響,而且今年初受咽喉炎鏈球菌爆發影響,都加重咗對藥物需求。

　　早兩日輝瑞仲發信同FDA(美國食品藥品管理局)講,預計到6月底,輝瑞供應畀兒童嘅梅毒的藥物芐星青黴素就會用曬,而呢一種更加係世界唯一可以透過胎盤治療胎兒嘅藥物。另外,輝瑞仲提到,仲有好幾款抗生素都準備用完,自4月以來,多種抗生素都一直處於短缺狀態。

　　FDA方面就話,有監測到藥物短缺,亦一直有同企業同醫生合作希望緩解緊急情況,不過都無權強制公司生產藥物或者採取其他嚴厲措施。

　　睇返魚缸今日醫藥板都有異樣,中概股之一嘅百濟神州(06160)跌足全日,晏晝最多仲跌超過15巴仙,而百濟神州其中一項主營業務就係抗癌藥,但係今日就要大跌。而另一隻有份做腫瘤藥物嘅雲頂新耀(01952)就暴升五成四,兩隻股分別係醫藥板嘅最大跌幅同最大升幅股份,唔知同美國藥物短缺又有無關係呢?請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。