《小傳日記》天熱奈雪訂單塞爆檯!香江分店反而旺丁唔旺財?

　　《小傳日記》美國債限議案繼噚日過完眾議院,今日就即刻過埋參議院,就等埋拜登畫隻龜就生效,環球股市齊齊慶祝,低殘嘅魚缸更加跑贏全個亞洲區,成為最大升幅市場!

　　霉咗成個5月,一到6月魚缸就煥然一新,消費板塊勁彈,下至體品股李寧(02331),上至內房股龍湖(00960),各個層面嘅消費股都谷底反彈,一來同市況好,二來有

618效應帶動。有內媒報道,零售板塊之一嘅奈雪的茶(02150)銷量暴升,全國門市銷量單日勁累升1.5倍,天貓數據顯示,奈雪更加成為茶飲類別嘅銷售no.1!

　　有神州網民親身去奈雪門市落單,問吓店員仲要等幾耐,點知前面居然有成200幾杯!店員忙到無停手,出餐枱面都擺滿嘢飲。有奈雪店長就話,今年618零舍火爆,一開舖就爆曬單

,有舖頭更加單日賣出超過3000杯,同海綿寶寶合作嘅新產品「霸氣一桶生椰鳳梨」成為熱賣冠軍,推出以來已經賣超過7000萬杯!有顧客就話,因為今年夏天真係好熱,一大桶冰茶灌落去非常降溫。

　　所以夏天真係非常有利水果茶銷量,終於又到咗水果茶嘅旺季。上面嘅奈雪咁火爆,香江唯一一間奈雪其實都好勁。雖然話就話喺山頂山高皇帝遠,不過位處山頂廣場最當眼位置,莫講話假日,就連閑日都非常之人頭湧湧。起初山頂奈雪都有好多款嘢飲同麵包,不過後來真係太忙,最近只係賣最熱賣嗰幾款,包就得三、四款,嘢飲都係十款左右,不過依然排曬長龍,想搵個位都難。

　　不過呢幾年以來,香江都只係得山頂呢間分店,睇嚟都係插旗居多,要搵錢真係起碼要有上面門市咁嘅銷量先撐得住,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。