《小傳日記》潤地接連中標番禺必爭之地,對手輸得好唔忿氣?

　　《小傳日記》神州市道復甦,跌到落谷底嘅內房市場都正係準備浴火重生,唔少發展商都蠢蠢欲動想大展拳腳。今日就有單消息,話國企內房龍頭潤地(01109)就同長隆聯合投得廣州番禺長隆度假區東南面嘅兩對合共4幅相連地皮,由於已經投到最高限價階段,最終要抽籤決家花落誰家。

　　據講呢一組地皮係兵家必爭之地,一面連接長隆度假區,一面連接萬博商務區。長隆度假區都不在話下,萬博商務區目前已經有39幢甲級寫字樓,另外亦有多間財團進駐。最重要係,呢組地皮已經規劃預留埋中小學用地,所以攞到呢組地可以話係只贏無輸。

　　由於呢塊地嘅重要性,據內媒報道,潤地一早已經吼實呢塊地,一早就「深度接觸」,仲同番禺「霸主」長隆達成合作,拍出前已經入場做緊前期工作。基本上呢次投地嘅條款可以話係為潤地「度身訂做」,競投呢兩組地,必須參與另外四組地嘅競投,同時土地競得者引入嘅商業項目管理同運營者必須係2022年《財富》世界500強中排名前100名嘅企業,同時引入購物品牌必須為太古匯、嘉里城、國金中心(IFS)、萬象商業、恒隆廣場其中一間。

　　其實好肯定已經係專為潤地而定嘅條款,不過地皮嘅吸引程度令到其他發展商都死心不息,所以另外三間國企背景內房包括保利(滬:600048)、招商蛇口(深:001979)同珠海華發(滬:600325)都要爭一爭。

　　兩塊地皮BA0902125同BA0902011都先後經過50幾口叫價去到最高限制地價,要進入抽波仔階段,首先係011,由潤地長隆奪得,一個鐘頭之後要抽125,結果都係潤地長隆奪得,現場即刻有人大叫「假的!」,結果招商蛇口同保利都拒絕簽署結果確認書,令到拍地現場要暫時封閉。不過一番時間後,最終當局都係宣布兩地係由潤地夥拍長隆奪得。

　　其實呢組地由地理位置嚟睇已經係國策級發展用地,加上潤地已經一早做好事前功夫,基本上潤地會「中標」已經係99.9%事實,就算對手一樣係國企,都唔係咁易可以阻撓得到,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。