《小傳日記》百度靠降成本提升利潤,咩價先買最理想?

　　《小傳日記》今日焦點係百度(09888),早排話3月會推ChatGPT聊天機械人,引起市場哄動,股價一度急升至166.3銀,可唔可以再度升到166銀,咁就真係視乎市場點樣睇百度個ChatGPT前景喇!

　　尋日百度公布舊年第四季同全年業績,第四季總收入按年比較微跌1100萬人仔,至330.77億人仔。全年計,舊年比2021年減少8.18億人仔,按年跌逾0.6%。

　　上季淨利潤按年升1.89倍至49.53億人仔,全年就升26%至10.96億人仔。

　　總收入減少(或基本持平)但經營利潤反而增加咁奇?原來係因為成本降低!百度銷售成本為169億人仔,按年跌2%;銷售及管理費用為59億人仔,按年跌9%;研發費用為57億人仔,按年大跌23%。即係上季總成本同費用比舊年同期減少39.07億人仔,全年就減少81.8億人仔!不過,成本總有下限,減無可減時就要一定要增加收入維持或提高利潤率。

　　集團指,上季自動駕駛服務蘿蔔快跑供應的自動駕駛訂單為56.1萬單,按年升1.62倍。截至2023年1月底止,就已累計向大眾提供超過200萬單自動駕駛出行服務訂單。舊年12月30日,蘿蔔快跑首批獲准喺北京開展全無人自動駕駛測試,令佢喺首都公共道路上提供全無人自動駕駛服務邁進一步。

　　另外,集團決定進行50億美元股份回購計劃,有效期至2025年12月31日。即係回購行動涉及金額,相當於截至舊年12月底止現金及現金等價物77.07億美金嘅65%,或相當於流動資產總額308.6億美金嘅16.2%。集團進行股份回購,正面嘅理由一係認為股價太平,一係對業務前景極度樂觀。

　　從呢個角度睇,ChatGPT唔通係百度股價加持百倍嘅靈丹?不過,由舊年10底低位73.7銀計,升到今個月最高166.3銀,升幅已超過一倍,就算回購,都唔會咁戇居喺呢個位買啩?決定唔到的話,可以問下ChatGPT機械人買唔買得過,判斷正確的話又可以Sale吓,一舉兩得!至於投資者可以點,短線的話,以穿130銀止蝕買入,120銀就最理想嘅買入價,上望166銀先啦,又或者等百度出手之後再跟進,集團回購價都可以作為強力支持位,但就要等吓喇!請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。