《小傳日記》匯控今日強勁反彈,重上70銀好艱難?

　　《小傳日記》今日魚缸跌住收,但匯控(00005)升住收。噚日放完榜之後,匯控由升轉跌近兩巴仙,今日開波已經升番上60銀,更加一度創超過3年新高,最後企得住60銀樓上。

　　呢份成績表最吸引人眼球嘅,相信係派息方面喇,因為匯控除咗宣布今年第一季會派番季息,因應之前出售加拿大業務,董事局考慮派付每股0.21美金特別股息,預計喺今年底落實,並且喺出年年初派付。另外,匯控預期將剩低嘅額外過剩資本分配到內部增長同投資機遇,可能喺現有股份回購計劃外,進行額外股份回購。

　　唔少大行幾滿意匯控今次嘅派息安排,當中高盛指匯控近期表現好過其他香港銀行,主要因為股息同回購透明度提高,但收入增長可能見頂,而匯控可能會喺業績公布後下調每股盈利,因此業績可能會減弱。

　　事實上,匯控除咗喺派息上做得唔錯,集團都逐步將歐美部分蝕錢業務撤走,同時加大喺亞太地區嘅資源投放,相信會幫到嚟緊嘅業績。近排股價走勢繼續強勁,今日仲要久違嘅上番60銀樓上。不過,正如大行所言,集團未來仲可唔可以保持比較穩定嘅增長,係主導股價繼續向上突破嘅重要因素。更何況,股價過去喺65銀嘅阻力唔細,9日RSI又就嚟嚴重超買,未必咁易上番70銀㗎!請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。