《小傳日記》間間都搶住做AI,連吉利都要踩過界!

　　《小傳日記》今日全民都係睇實隻象(00005)!今朝就成朝撳住撳住升唔到,中午正式放榜,今次就派23美仙第二次股息,2022全年就派32美仙。放榜前最期待嘅季息都有著落,今年第一季業績就會開始派返,到出年年頭仲有可能派21美仙特息,仲有可能額外再回購,真係一鋪返埋嚟!不過期待成真之後就係時候散水,晏晝開市鬼馬升一升之後就大幅倒插,最後都要跌2巴仙完場。

　　匯控晏晝仆直,連帶科技股都衰多兩錢重,今日科指跌足3巴仙有多,仲要穿埋條牛熊線,走勢相當時不利!不過都無阻大公司衝入AI概念之中,今日就有內媒發現到吉利(00175)都要同AI扯上關係。近排吉利手機旗下湖北星紀時代科技就被發現申請咗好幾個商標,包括「孔明AI大腦」、「孔明AI」同「KONGMING　AI」等等,不過由舊年7月開始申請,居然最後係被駁回複審,不過吉利方面無放棄,1月30號再次提交「孔明AI大腦」嘅申請。

　　原來吉利唔聲唔聲就已經踩咗入AI概念之中,如果係吉利自己申請就有可能係智能駕駛,不過係吉利手機申請,就有更加多幻想空間。照咁睇可能呢個「孔明」會係類似小米(01810)嘅小愛同學一樣,係語音搜尋AI,咁係最基本,但係而家ChatGPT咁hit,都話唔埋吉利手機會乘機轉埋做類ChatGPT嘅聊天機械人。

　　雖然吉利做電話好似純粹係做多瓣,但係如果電話AI技術可以支援埋智能駕駛技術,就可以同吉利汽車無縫接合,分分鐘可以做到第一架連接聊天機械人嘅新能源車,不過而家吉利手機都未有咩聲氣,起碼都仲要多一兩年先,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。