《小傳日記》QQ牛一懷緬吓,點知冧完server又冧價!

　　《小傳日記》魚缸呢排真係弱爆,跌完仲有得跌,今日就係美國嗰邊又話要限制投資神州先進科技,於是就借勢狂沽科技股,尤其之前爆上嘅百度(09888)今日跌得仲甘,完場又唔見多7巴仙,之前炒AI嗰啲都已經回吐曬仲要嘔凸。

　　今日科技股都算係當黑,原來今日科技股血崩嘅時侯,同時又係QQ(00700)旗下真嗰個通訊QQ24歲生日,不過今日QQ都唔見3巴仙,真係夠曬喜慶。唔只係咁,衰開有條路,今日連QQ都冧埋server!今朝好多用戶都發現忽然用唔到QQ,包括Mac版登錄唔到,手機版又收發唔到。好快就有內部人員透露,可能真係因為好多人醒起佢今日牛一,所以連平時唔log　in嘅人都入去湊吓熱鬧,一時間塞爆咗。

　　而QQ就喺微博回應:「看來是鵝的祝壽隊伍太龐大,服務器擠爆了……別擔心,現在已經恢復啦」。不過有好多人都喺下面贈興,唔冧都醒唔起自己有個QQ!事關QQ主要都係PC機先會用,但係而家主要都係用電話,所以好多以前用開QQ嘅都已經用緊Wechat。其實神州用QQ就等於香江呢邊用MSN一樣,都係青春嘅歷史回憶,尤其是80後90後就最有共鳴。不過MSN已經收咗檔好多年,要搵回憶都搵唔到,相反神州同胞仲可以間唔中入吓QQ掃吓塵。

10201號」用戶,原來就係1999年第一個試用QQ嘅用家,佢回憶返第一次用QQ嘅感覺就好似入咗新世界咁,而家QQ股價比起上市當年都一樣係另一個新世界咁啦,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。