《小傳日記》車股今日齊開動,吉利強勢可追捧!

　　《小傳日記》魚缸開頭走勢麻麻哋,去到尾段美團(03690)、小米(01810)、百度(09888)等科技股發力,銀娛(00027)、金沙(01928)等賭股亦因為1月賭收好過預期而上升,魚缸最後升番上兩萬二樓上收市,而20天線附近又有支持,呢條防線真係唔失得呀。

　　除咗科技股同賭股之外,汽車股今日成為另一位主角。BYD(01211)繼續有人掃貨,開波初段升近4巴仙,之後愈升愈有,曾經升上去262銀,幾乎修補晒8月尾嘅下跌裂口,繼續沿住條保力加通道上升,氣勢非常強。不過,BYD今日有咁多升幅,股價又升到嚴重超買,指定動作:食咗胡先喇!

　　另一隻表現唔錯嘅車股係吉利(00175),早段升超過3巴仙,之後升勢保持到尾。公司旗下英國跑車製造商「蓮花汽車」宣布,計劃透過反向收購SPAC公司,喺美國尋求上市,

以推進電動汽車發展。仲有,吉利據報旗下電動汽車品牌「極氪」準備生產新款緊湊型SUV,將會係旗下第三款車型。呢款SUV可能命名為003,係五門緊湊型跨界車,計劃喺今年較晚時候投產。

　　雖然吉利未有回應呢項計劃係真定假,但呢單消息畀缸友憧憬下,全日資金淨主動買入超過1億銀,比上日淨流入超過5800萬銀好。今日股價仍然企喺10天線樓上,雖然未升破250天線,但依家嘅9日RSI同嚴重超買區仲有段距離,可能進一步升上14.75銀。既然吉利升勢咁強,即使依家買一手1000股都要萬三銀,都唔可以錯過呀!請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。