《小傳日記》2022風起雲湧,2023疫後重生?

　　《小傳日記》時間過得特別快,嚟到2022年最後一個交易日。魚缸今日高開289點,一開波已經上番兩萬大關,個頭本來開得幾好,之後有少少腳仔軟。

　　今日有咁嘅情況,或多或少同重磅股美團(03690)有關。開波嗰陣仲升緊,唔知咩事突然轉向,曾經倒跌超過4巴仙。美團今個月有幾次突破唔到190銀,今朝股價曾經升到188.5銀,但好快跌番落去,仲要一下隊穿10天線同20天線,睇嚟190銀嘅阻力非常大。

　　醫藥股今日都有啲回調,特別想講中生製藥(01177)。公司附屬正大天晴藥業同平安鹽野義簽訂獨家市場推廣協議,獲得新冠病毒感染治療藥物Ensitrelvir喺內地嘅獨家市場推廣權。股價高開5%,但走勢逐步轉弱,中段更加試過倒跌。事實上,新華製藥(00719)、石藥集團(01093)、復星醫藥(02196)等醫藥股今日表現麻麻哋,新冠藥物嘅炒作都可能到尾聲喇。

　　有悲都有喜,有啲教育股繼續升得興奮。國家教育部宣布,高等學校唔再開展全員核酸篩查,師生出入校門唔使提供核酸證明,甚至要求無疫情嘅學校開展正常嘅實體教學活動。龍頭之一嘅中教(00839)由跌轉升,曾經升超過6巴仙;中國科培(01890)、新高教(02001)亦升超過6巴仙。至於有做直播帶貨嘅新東方在綫(01797)就保持強勢,由5月開展嘅上升趨勢仲未中斷,股價年內累計升超過5倍。呢隻非一般嘅教育股氣勢如虹,仲未知幾時見頂。

　　經歷過疫情、加息、俄烏戰爭、內房危機等大事件,魚缸今年年初傷勢嚴重,即使年尾發力,但已經嚟得太遲,結果全年跌超過3000點。不過,阿爺愈嚟愈放寬封控措施,亦著力搞好通關嘅事,唔通雨後真係見天晴?希望2023年有個好開始,各位最緊要身體健康,平平安安呀,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。