《小傳日記》胡錫進公開質疑官方確診數字,繼續放寬好容易?

　　《小傳日記》今日魚缸繼續向20000點挑戰,不過一上到19900就明顯頂住,睇嚟12月要試上20000都唔係咁容易。

　　當然推升魚缸最大力度都係神州放寬防疫,呢排都係圍住嚟炒,而上面嘅鬆手速度都係比預期大,不過有專家就提到,嚟緊天氣轉涷,人民抵抗力會轉弱,呢個時候嚟大力放寬可能會令確診數字飆升。

　　但係《環球時報》前總編輯胡錫進就出文講到,批評官方數字「唔真實」,無理事由放寬之後確診個案不升反跌,覺得同佢觀察所得嘅情況同網上「可信」嘅信息有出入。佢話,估計北京而家嘅單日新增感染人數,已經超過上海今年春天嘅最高單日新增個案數字,覺得北京而家嘅單日新增感染人數已經超過兩萬單。跟住佢就講到,如果而家各地都係按照一種已經脫離真實情況嘅計算方式上報,應該已經有唔少地方嘅數字嚴重偏離實際情況。所以,應該一係報返啱,一係就索性咪報!

　　唔報確診數字,其實一早已經有香江專家提過,事到如今應該著重重症同死亡個案,減低重症數字先係方向,而包含輕症甚至係無症狀患者嘅確診數字已經唔重要。如今胡錫進吹風唔報確

診數字,相信都係神州主流第一次出現呢種概念,而呢個風當然都要配合神州放寬嘅方向先可以吹得成,相信好有可能會開始好似香江專家好耐之前講咁唔再報確診數字,到時唔知香江仲會唔會繼續報緊呢?請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。