《小傳日記》ＡＴＭＪ跌到暈，缸友望到眼都凸……

　　《小傳日記》卓慧思只係做咗４０幾日英揆，依家英國又準備一場新嘅黨魁爭奪戰。二十大正式結束，新嘅管治班子上台，會唔會繼續「動態清零」仍然係未知之數。神州第三季ＧＤＰ增幅好過預期，但係消費品零售同房地產表現麻麻哋，經濟前景仲未明朗。

　　外圍形勢風起雲湧，即使上星期五美股升接近７５０點，但呢邊魚缸跟唔到一齊升。今日即月期指喺開市前１０分鐘由升百幾點，突然急插超過３００點，心諗：呢鋪唔對路喇。一開波跌３００幾點，萬六關一嘢就篤穿咗，之後愈跌愈有，跌到收唔到掣咁。食完晏晝飯已經跌超過１０００點，最後雖然守得住１５０００關，但單日跌過千點，真係望到眼都凸埋。

　　今日跌得咁甘，多得ＡＴＭＸＪ唔少。ＱＱ（００７００）、巴巴（０９９８８）跌超過一成一；美團（０３６９０）、京東（０９６１８）跌超過一成三；小米（０１８１０）都要跌近９巴仙。其他科技股都唔好得去邊，快手（０１０２４）、嗶哩嗶哩（０９６２６）、百度（０９８８８）跌超過一成二。有傳美國叫停最少４間小型中國公司ＩＰＯ，中概股難免成為今日淡友嘅攻擊目標，但今日出現呢種咁極端嘅沽貨情況，相信市場對中概股嘅前景非常無信心。

　　內房、內需股因為經濟數據表現一般，今日齊齊插落去。中海外（００６８８）、龍湖（００９６０）、碧服（０６０９８）跌超過一成；李寧（０２３３１）、海底撈（０６８６２）跌超過７巴仙。有啲汽車股撞車損毀，小鵬（０９８６８）今日再跌超過一成，進一步跌穿３０銀；長汽（０２３３３）純利按年急升超過八成，今日高開近７巴仙，最後都只係升３巴仙。

　　今日「黑色星期一」，魚缸失守萬六關之餘，仲要錄得２００９年４月以嚟最低收市位。月線圖繼續扇落去，一個又一個支持位輕鬆打穿。淡友繼續好開心，呢股咁強嘅氣勢擋都擋唔住，魚缸睇怕仲有得回。唔通要跌到１１０００點，先見「終極一底」？請請！

＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議

及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。