《小傳日記》十四億市場唔係人人做到,葉老闆袋28億銀早走早著

　　《小傳日記》今日個股焦點莫過於耀才證券(01428-HK)大股東賣盤呢單料。耀才宣布,獲螞蟻控股向集團主席葉茂林收購持有嘅耀才50.55%股權,涉資約28億銀。每股作價3.28銀,較4月23日停牌前造價3.05銀有7.5%溢價。受消息刺激,耀才股價一度急升近倍,高見6蚊銀,創自2010年上市以來新高。

　　呢單買賣爆出後,唔單止耀才股價急升,本地券商都可以搭轉順風車,英皇資本(00717-HK)最多升近一成半,結好(00064-HK)最多升近9%。講起本地券商股,真係有啲令人唏噓,本地券商近年買少見少。所以今日有同事問筆者,香港仲有乜嘢本地券商股時,筆者剎那間居然噏唔出。筆者話曬喺呢行十幾年,換做以前,隨口都可以噏到好幾個,規模較大、知名度較高嘅有新鴻基證券,大福證券,金利豐……但呢幾個本地知名券商,唔係賣盤畀中資,就係退市,再唔係就賣完盤再退埋市。大券商都咁難捱,更何況細券商?單係舊年,就有30多家關門大吉。

　　言歸正傳,對於耀才今次賣盤,有分析認為,今次交易屬於大平賣。事關按照耀才早前預測,截至3月底財年,公司純利有成6億銀,按年升一成。按今次成交價計,耀才市值約56億銀,即係市盈率約9.1倍左右。而騰訊(00700-HK)有份持有並喺美國上市嘅富途,舊年純利54億銀,以上周五(25日)收市價計,市值為122億美金(約954億銀),市盈率達到17.6倍。而小米(01810-HK)有份投資嘅老虎證券母公司向上融科,舊年純利6072萬美金(約4.7億港銀),但市值則有13.6億美金(約106億銀),市盈率高達22.4倍。相比之下,耀才市盈率約為富途一半,為老虎證券約四成,用呢個準則計算,的確係賣平咗。

　　點解要「平賣」?皆因形勢比人弱,講嘅唔淨止係耀才,幾乎本地券商都面對同樣問題。香港回歸以來,最先係中資券商不斷湧入,透過收購設點搶佔先機。但發展到而家,連騰訊,螞蟻呢啲本來同券商風馬牛不相及嘅財團都染指券商,令呢個本來已經競爭激烈嘅行業形勢更嚴峻。

　　而家嘅券商,主要服務對象係祖國14億人口,香港幾百萬客仔算乜嘢呀?而且,中資企業無論去到邊,都會使出佢哋嘅獨門武器--「薄利多銷」,將佣金收費降至最低,甚至免佣吸客

,然後喺其他方面賺返。雖然,耀才都係以呢招起家,但人地大財團備考祖國,實力雄厚,要錢有錢,要客有客,最重要嘅係佢哋擁有內地嘅獨特優勢,很多客戶足不出境就可以開通帳戶買賣港股。雖然話監管機構有出手整治,但效果如何?有幾多人無落嚟香港,一樣可以繞過港股通,直接網上買賣港股?

　　唔係馬後炮,2023年當耀才宣布,為積極配合內地監管措施,將之前所有內地客戶喺國內開立嘅證券帳戶,全面暫停買入股票時。筆者就覺得大股東早晚要退場,問題只係幾時退、同

埋點樣退。而家賣畀螞蟻,仲可以保留上市地位,筆者覺得情況都算唔錯。筆者至今仍然好奇,其他同樣踩界喺內地幫客戶開戶嘅券商,唔知有無好似耀才咁全面註銷呢類帳戶,同時停止買賣呢?不過算啦,筆者而家就算好奇,都唔敢問,畢竟而家咁嘅環境,謹言慎行先至係生存之道,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。