《小傳日記》機械人運動會開幕在即,真假機械人未開賽先跑出

　　《小傳日記》繼早前北京人形機器人半程馬拉松之後,全國首屆具身智能機器人運動會據報將於4月24-26日喺無錫舉行。未等運動會開幕,但機械人概念相關股已經率先跑出,股價齊齊飆,其中優必選(09880-HK)同越疆(02432-HK)最多曾升約一成九。地平線機械人(09660-HK)最多都升過一成半。

　　不過,講起地平線機械人,雖然個名有「機械人」三個字,但主題業務圍繞智駕解決方案,搞到有好多人質疑佢嘅機械人身份。睇返公司資料,集團的確係從事汽車智能晶片業務。再詳細少少,就係智駕解決方案供應商,提供先進嘅乘用車高級輔助駕駛(ADAS)以及高階自動駕駛(AD)解決方案嘅供應商。集團舊年總銷售額中,汽車解決方案產品及服務佔97%,而剩下非汽車解決方案只佔3%,而且未具體列明是呢3%之中,有幾多係機械人成份?甚至究竟有無機械人成份都成問題。難怪有媒體直言,地平線機械人純粹得個名有「機械人」三個字,言下之意似乎唔係真嘅機械人相關股。

　　但其實,地平線機械人的確有同機械人相關嘅業務,事關旗下全資附屬嘅「地瓜機器人」都掂到呢瓣。雖然地瓜機器人強調,佢哋唔係機械人亦唔生產機械人,佢哋嘅初心係成為「機械人人時代嘅Wintel」,唔會涉足機械人本體。但正如CEO王叢所講「地瓜機器人除咗唔做本體,其它乜都做。」

　　既然做嘅嘢同機械人有關,咁地平線都算同機械人扯上關係,唔可以話假,只係純度唔夠嘅問題。坦白講,仲有好多機械人相關股一樣純度唔高,但股價炒起上來隨時更癲。好似上海電氣

(02727-HK)咁,舊年10月話注資母企工業機械人業務,股價大半個月升一倍幾。所以話,只要同機械人扯上關係,唔憂股價無得升。雖然上海電氣今日股價無乜點郁,而且現價比舊年11月高位都回調唔少。不過,比起舊年注資機械人業務前,現時股價仍有約一半升幅,所以機械人概念真關係長炒長有。

　　不過,炒還炒,都要保持頭腦清醒,機械人相關企業有排都未到收成期,除非有其他非機械人業務賺到錢可以幫補吓。否則,單靠機械人業務大部分都未有錢賺。好似機械人概念純度比較高嘅越疆咁,舊年仲蝕緊9500萬人仔,上市四個月股價升三倍。至於優必選,雖然而家股價只得約85銀,距離舊年高峰時328銀仲有好多水位,但舊年蝕11億人仔,幾時有錢賺真係無人知。所以,炒時炒,都要保持頭腦清醒,如果股價太癲就無謂搵命搏。請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。