《小傳日記》滬指長假後再潛水,蝶式谷唔起唔通要出自由式?

　　《小傳日記》內地人工智能(AI)大模型DeepSeek橫空問世,憑住低成本煉成高等AI嘅技術,唔單科技界為之側目,就連國際政經界都為之轟動。花旗總統特朗普評價DeepSeek不突止,仲同意大利、澳洲齊禁政府機構使用。晶片龍頭英偉達更加上演一齣「死俾你睇」,股價上周試過一日之內插水一成七,可想而知技術革新所帶嚟嘅威力。

　　DeepSeek推出無幾耐,已經得到中外科技巨頭垂青,據知繼騰訊(00700-HK)旗下騰訊雲及華為雲後,阿里巴巴(09988-HK)旗下阿里雲及百度(09888-HK)的百度智能雲,亦宣布上線DeepSeek大模型。而之前華為雲、騰訊雲、360數字安全等多個平台已經宣布上線DeepSeek大模型。就連花旗國巨頭亞馬遜、微軟、英偉達等全球多間科企陸續宣布接入DeepSeek-R1模型。

　　DeepSeek風頭可謂一時無兩,反觀加州矽谷頓時風聲鶴唳。各大科技巨頭而家都頭痕,燒咗數以億美金計整出來嘅嘢,原來神州小民企幾百萬美金就搞得掂,仲要唔使高端晶片就整到嗰下先攞命,意味住以後唔使俾人揸頸就命,再咁落去隨時俾人全方位超越,不過好在DeepSeek技術全開源,有功課可以抄。自從花旗國實行高端晶片封殺以來,神州科技巨頭就憂心忡忡,擔心發展受限。而家證明唔使高端晶片一樣發展如常,科技大佬大可以鬆一口氣。

　　DeepSeek爭氣,可惜A股唔爭氣。A股今日放完農曆年假返來,正當大家都翹首以待,諗住難得可以食住DeepSeek條水,蛇年首日或者可以紅盤高收,點知虎頭蛇尾,上證指數雖然高開近20點,結果埋單倒跌21點。雖然DeepSeek概念股開盤全線爆升多股漲停,科技股行先嘅深市有得升,以傳統行業為權重嘅滬市就冇得升。又係嘅,要提振神州資本市場,一招蝶式(DeepSeek)係唔夠,最好出埋自由式或者混合式,多管齊下,A股或者有起色。

　　其實,內地經濟放緩除咗係房地產爆雷造成連鎖反應之外,股市唔生性亦係一大主因。股市下跌唔單止無法帶動財富效應,相反,唔少股民被割韭菜,搞到損手爛腳,仲點消費?所以,要谷經濟,除咗關稅要傾,揾出搞到股市一鑊粥嘅原因,對症下藥亦都好重要。只要股市回升,相信一定好過派乜消費券。

　　金融海嘯過咗咁多年,人地花旗國道指一早已經過咗海嘯前嘅萬四點高峰兩倍有凸,滬指就永續三千點,試問點同人比?雖然,政府耐唔耐就推政策提振股市,但一味靠政策市衝一波,一般投資者無春江鴨咁厲害,一早「估到」有乜嘢政策出,買定貨等政策推出就割韭菜,無法吸引中長期投資,又點可以形成賺錢效應,消費又點會唔下沉?現任中證監主席吳清作風雷厲風行,管東管西最終都係管唔到股市大升,展望新一年花旗國唔知減到幾多次息,關稅戰又要打響,A股或者需要更多刺激,先可以一洗頹氣,步步高升。請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。