《小傳日記》毛戈平幾經波折終上市,不妨搞埋「至美終生」生態圈

　　《小傳日記》噚日港股高潮迭起,恒指挾前日政治局會議嘅餘威,高開六百幾點,點知有頭威無尾勢,開市已見全日最高位,尾段更加晚節不保,倒跌百點收市。一日之內經歷先急升後倒跌,相信嚇壞唔少散戶!不過,好彩有新股毛戈平(01318-HK)首掛高收七成幾,除咗可以慰藉一下有份申請認購嘅小散戶之外,仲為個市帶來多少希望!

　　毛戈平係內地高端美妝集團,早前招股時獲得超額認購逾900倍,涉資近2千億銀,成為今年港股「凍資王」,最終以招股價上限29.8銀定價。噚日首掛收報52.6銀,較招股價

高出近七成六,即一手帳面賺約2280銀,至於去到今日毛戈平股價就微跌1%,企未企穩好難講。

　　一般情況下,新股超額認購逾幾百倍,小散戶好難分到股票。但由於今次毛戈平派股傾向照顧小散戶,一手中籤率達百分百,令小散戶今次可以有錢落袋,唔使得個「恨」字。

　　毛戈平從招股到噚日首掛股價走勢,反應都異常熱烈,難以想象佢嘅上市之路竟然係咁曲折。早喺2016年12月,毛戈平首次喺A股提交招股書,但2017年底遭中止審查。而毛戈平最大嘅外部投資者九鼎集團喺2018年,因涉嫌違反證券法律法規被證監會立案調查,之後多個同九鼎系有關嘅IPO計劃都被延誤或終止,有分析認為,九鼎事件多少影響毛戈平上市進程。

　　沉寂幾年後,毛戈平喺2021年上市申請通過首次審批,不過上市計劃並沒有如期推進。

直到2023年3月,毛戈平再次更新招股書,但半年後因申請資料過期,上交所中止對其上市申請審核,相關信息顯示,毛戈平嘅上市進程係「暫停」。

　　2024年1月,毛戈平撤回A股嘅上市申請,改為申請來港上市。4月8日,毛戈平向港交所首次遞交招股說明書,因招股書於10月8日(滿六個月)失效,於是10月9日再次更新上市申請。經過一番努力,終於喺12月10日正式喺港交所掛牌上市,成為「港股國貨彩妝第一股」。千呼萬喚終於迎來三高:高認購額,高開,高收。成為噚日香港金融市場一大焦點,或者毛戈平本人都始料不及,資本市場對佢嘅愛不下於內地美妝KOL!

　　噚日毛戈平股票首掛,大股東毛戈平敲鐘嘅片段不斷喺財經新聞翻播,友人睇過片段後問筆者,呢位老闆係唔係搞醫美㗎?如果搞醫美嘅話,應該會好成功,以佢嘅生招牌做廣告,應該幾

有說服力。筆者覺得呢位友人所言非虛,毛老闆確實有呢方面嘅天賦。何況搞一次上市都搞得咁辛苦,而家上咗市,就更加要發大嚟做。既然小米(01810-HK)搞完手機同智慧家電,都可以搞埋電動車,構建成一個小米生態圈,仲搞得咁成功。其實毛先生都可以考慮照辦煮碗,搞埋醫美,時裝,甚至包包,再整番個「至美終生」生態圈,話唔定會好似阿雷生一樣咁成功,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。