《小傳日記》SPROCOMM插九成!賣平價機點煉成百億市值?

　　《小傳日記》近兩個星期係季績公布期,各大上市公司忙住公布最新季度業績。一般情況下,業績好股價就自然炒上,反之則跌。不過,近期有少少例外,業績好嗰啲,股價隨時倒跌,反而業績普普通通嗰啲,股價隨時飆升。當然,升跌總要搵藉口,例如業績好但預期第四季會轉差,又或者業績不好,但市場一早預咗衰,而家無咁衰,所以股價升得有道理之類,凡此種種。呢度就唔逐個講啦!

　　不過大市窄幅上落,個市悶悶哋,但就爆咗一隻焦點股票出嚟,講緊唔係啱啱出咗業績嘅小鵬汽車(09868-HK),亦唔係中移動(00941-HK)有意收購嘅香港寬頻(01310-HK),而

係名不經傳嘅SPROCOMM(01401-HK)!所謂不鳴則已,一鳴驚人。今日成為跌幅榜榜首,股價最多蒸發91%。收報1.50銀,比噚日收市價12.46銀,跌88%。

　　之所以跌咁多,原因係畀證監查,話公司26名股東合共持有5.17億股該公司股份。另有4760.4萬股該公司股份,雖然喺香港股東名冊中登記為香港中央結算(代理人)有限公司所持有,但並無結存於中央結算及交收系統。有關股權連同由該公司兩名大股東持有之3.45億股,相當於該公司已發行股本之91%。亦即係話,該公司實質只有9002萬股係街貨,佔已發行股本之9%。

　　唔好以為暴升暴跌就一定係股仔,原來SPROCOMM市值以噚日收市價計有成125億銀,所以算係大市值公司,而且今日成交都過億銀!就算公司而家跌足八成幾,但市值都有成十幾億銀。與其問呢間公司點解今日跌成咁,不如問下呢間公司做啲乜嘢業務先可以谷得起百億市值?

　　根據資料,SPROCOMM係按ODM基準從事研發、設計、製造及銷售手機及手機的印刷電路板組裝。主力都係賣低價手機,佔營業額約64%,以市場區分,中國、印度、巴基斯坦

三地佔公司總營業額95.6%,筆者點入公司主頁,發現公司生產嘅手機有三款,其中兩款聽都未聽過,至於另外一款叫Nokia　C3,似乎係諾基亞發布嘅入門級智能電話,2020年發布嘅售價係699元人仔,不過時移世易,如今估計都已經被其他百元級手機取代咗生態位喇。

　　SPROCOMM喺2023年做28億人仔生意,賺得3200萬人仔,而無論係營收定係利潤,2023年已經係過去四年中最標青嘅一年。咁就做到百億銀市值公司,市盈率高達390倍,真係有啲意外。如果係一家獨角獸,或其他具潛力嘅初創企業,高市盈率甚至未有錢賺,都仲有啲希望,但以一家做ODM生意嘅企業來講,真係有啲不可思議。其實,公司2019年年尾上市,上市價0.5銀,股價頭三年變動不大,舊年大炒一輪股價最高上到4銀。今年再炒一鑊,股價最高去到15.3銀,正式登上百億市值寶座。而家股價跌成咁,只可以講一句,「邊度來邊度去」,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。