《小傳日記》董宇輝真正「自立門戶」?東方甄選績前炒高會捱沽?

　　《小傳日記》近期魚缸回落,今日連17000都穿過,實在係令人灰心。不過跌市期間,早排日日跌嘅東方甄選(01797-HK)反而逆市向上,今日仲偷偷哋上埋條廿天線,唔通真係翻身?

　　道歉當食生菜嘅俞敏洪喺6月初道完歉之後,總算係過咗個半月嘅平靜,呢段期間都無發生任何要令俞敏洪道歉嘅事,太耐無見反而有啲掛住佢道歉嘅日子。近排「韜光養晦」期間,東方

甄選就有「異動」,就係董宇輝真正「自立門戶」。啱啱上個周末,董宇輝品牌「與輝同行」正式由新東方總部搬址,去到真正自己嘅小天地。

　　喺搬遷期間,一早已經有唔少「丈母娘」去到新總部圍觀,都有唔少有實力嘅「丈母娘」一早就就嚟花籃同蛋糕祝賀。而喺21號晚,與輝同行就搞咗一場入伙直播,帶網民隔住鏡頭參觀咗一轉新基地。就喺呢場直播之後,竟然可以令與輝同行抖音號一晚就多差唔多17萬fans,果然人紅就連入伙直播都可漲粉,如果東方甄選個價都有咁嘅升幅,你話幾好呢。

　　直播期間董宇輝就提到,今次新辦公室方方面面都多得俞敏洪大力支持,總算係幫俞老闆加返啲光環。新基地有一大片訪談區,另設兩個大直播間同一個攝影棚,其餘辦公區域都多咗空間,皆因今次與輝同行係租咗全層總共2000呎嘅辦公室。董宇輝都提到,新總部大咗好多,新地方租金比原先地方貴咗五倍,所以近期營運壓力都大咗唔少。

　　呢個半月東方甄選終於回歸平靜,但暴風雨嘅前夕總係特別平靜,下個禮拜就係阿媽新東方(09901-HK)同東方甄選嘅放榜大日子,雖然近期普遍都有券商唱好,但咁高預期而且又炒起咗,會唔會一出完成績又嗌差過預期跟著又倒跌呢?都未必唔會發生!希望兩份成績表都好好睇睇,如果唔係,俞敏洪可能又要為業績太差而道歉,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。