《小傳日記》減免港股通股息稅係傳聞?中金都背書好難唔係真…

　　《小傳日記》繼中證監五招救魚缸之後,阿爺果然都係鍾意出組合拳,噚日收市後再有傳阿爺計劃減免港股通個人投資者嘅股息所得稅,魚缸今日升400幾點仲差啲「一登萬九」,但19000前阻力始終唔細,下晝收市前幾次挑戰都唔成功。

　　雖然仲係外電引述消息人士傳聞,不過減免股息所得稅吹足全日又反應咁好,間間大行都爭著出嚟分析減免後對魚缸嘅利好程度,就知空穴來風未必無因。尤其是消息之後,國企背景嘅中金第一個跳出嚟背書,好有可能只係差在正式公布。

　　以目前稅率計,同胞缸友經港股通炒H股收息,H股公司會代扣20%作為個人所得稅;投資非H股收息,就會由神州方面扣20%作為個人所得稅;再到紅籌股,除咗20%代扣所得稅之外,仲有可能要扣10%企業所得稅。所以今日消息公布之後,中特估之中嘅紅籌股就升得最犀利。

　　中金報告就提到,雖然直接減免規模相對有限,但仍然有助於提振情緒。中金以過去三年全部港股通股份股息總額每年平均1.8萬億銀,計算港股通投資者喺每隻股票嘅持倉佔比及20%港股通紅利稅收標準,港股通每年帶來嘅股息稅收大約450億銀,預計今次股息稅減免總額大約為100億銀左右,「此次潛在調整所帶來的短期直接減免規模或有限,但或從情緒層面帶來提振。中長期看有助於提振港股高分紅資產吸引力,提升港股流動性,甚至有助於部分公司AH溢價的收斂」;中金「客觀地」為今次呢單消息唱好。

　　恒指原本到18600前已經見到阻力,正當此時就再有消息帶動恒指拉升,雖然今日19000前勒著,但下星期返嚟19000可能一開市就破,到時19000就有可能阻力變支持,畢竟如今恒已經確認重返上年中嘅18200至20000大區間,今趟大有機會行返呢個橫行區做整固,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。