《小傳日記》吉利係咁拆,唔蝕都唔拆,係減低風險嘅重要對策?

　　《小傳日記》全球市道回暖,唔少大集團都爭著分拆旗下公司上市,最新吉利(00175-HK)就公布旗下極氪終於正式向美國證交遞表,初步預計發行1750萬股ADS,發售價介乎18至21美金,而吉利計劃認購最多3.2億美金嘅新ADS。吉利所持極氪股權將由51.3%減少至47.4%。

　　招股書提到,分拆極氪所得大約45%資金將會用於開發更先進嘅電動乘用車技術,另外45%就用於營銷、擴大服務以及充電網絡,剩低10%就用於一般公司用途包括營運資金需求。由此可見極氪嘅上市係「好等錢使」嗰種籌旗,「開發新車」同「加強營銷」就係籌旗主力用途,亦係目前車廠嘅頭等大事。而極氪盤數亦都好麻麻,上年全年仲蝕緊82.6億人仔,淨負債約86.8億人仔,咁大個氹都好難唔令人著急。

　　雖然蝕緊83億人仔嘅係極氪,但心急嘅唔只係極氪,而係吉利。除咗極氪之外,吉利控股旗下近期仲有隻曹操出行都向港交所遞表,而曹操出行同極氪一樣,到上年為止仲係蝕緊錢,2023年錄虧損19.81億人仔。

　　吉利旗下有好多品牌,近期接連將蓮花、極氪同曹操出行分拆,而三個都係蝕緊錢嘅牌子,分拆出去一來籌旗,二來再將虧損同孖屐「共享」,都算精明。而吉利近期拆得咁急,都反映吉利自己對後市都未必睇得咁好,如果而家再唔賣仔,愈遲只會愈cheap,一於有賣趁早。

　　吉利以前就威在多品牌,有高端有下沉,但而家周街都造車,吉利咁多品牌反而成為咗弱點,保得著一個牌都已經好難,吉利仲要咁多個,所以而家都難免要分散風險。吉利噚晚條通告都鬼拍後尾枕,「分拆將使投資者更好地評估本集團,並專注於本集團(極氪集團除外)營運的主要業務」,擺明車馬係驚極氪陀衰家嘅講法,「同時在需要時為極氪提供持續直接及獨立進入股權及債務資本市場的機會」即係要批股批債就自己搞,唔好搞著我,吉利今次可以話頭都唔摸咁賣仔,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。