《小傳日記》美團贏在慳著使?迎擊拼多多要加快諗計!

　　《小傳日記》業績期得返唔夠一個禮拜,美團(03690-HK)醜婦終須見家翁壓軸放榜,好在都唔算太樣衰,今日成功跑贏大市升差唔多6%。

　　美團上年第四季經調整純利有43.75億人仔,勁升4.28倍,大勝預期嘅29億人仔!所以今日都成為ATM唯一有得升嘅股份。以分部嚟睇,季內配送服務收入由198億升大約一成到219億人仔,算係不過不失,而相對大驚喜就係在線營銷服務,季內收入成109億人仔,大升四成有多。

　　外賣配送收入增長唔高就梗,始終已經係高基數,但係在線營銷收入基數低自然就有比較大升幅。美團今份業績,主要分為「核心本地商業」同「新業務」;外賣、美團閃購、團購同預訂酒店業務算係前者,而改名做「小象超市」嘅美團買菜同社區電商就係「新業務」之內。

　　雖然單睇純利係好過預期,但係成份成績表入面,依然未係好見到有好吸引人嘅新業務動力,似乎美團仲係處於探索緊新收入來源嘅階段,而小象超市等等嘅在線營銷就算係開始有啲料到嘅新項目。可以睇到美團上季嘅主題仍然集中喺「節流」,其次先係「開源」。季內銷售成本雖然由431億人仔增加到487億人仔,但佔收入百分比就由71.8%減少5.7個百分點到66.1%,反映就算未賺到更多,就已經成功降本增效。

　　拼多多被視為美團最大對手,尤其係日用品+食品配送方面,小象超市就係對標拼多多嘅一瓣。面對拼多多嘅進擊,美團都被打殘,沽到紅底不保。昔日同QQ(00700-HK)、阿里巴巴(09988-HK)一樣各佔恒指8%權重,喺上次季檢已經得返4%多啲,相反QQ巴巴就仲keep到。節流雖好,但如果美團仲唔加快開源力度,真係繼續減磅都唔定,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。