《小傳日記》小米反駁華為要對科學尊重,鬥先進不如鬥襟用?

　　《小傳日記》魚缸噚日穿過16000,今日先識彈返200幾點。而隻小米(01810)今日都自上個月中以來第一次彈返4%有多,因為今日小米就確認將會喺今個月尾搞汽車發布會。

　　呢兩日有傳小米會喺今個月28號舉行汽車發布會,不過小米今日就話的確係會差唔多時間公布,但其他就無可奉告,「其他內容全是假的」。但係今日小米都有是非,事緣對手華為常務董事余承東早幾日就喺華為花粉年會上面,話「友商」唔尊重知識產權,改個名就當係自己出品,話「友商」「將雙旋水滴鉸鏈直接變成了龍骨鉸鏈,但實際上並沒有龍骨的存在,其實就係暗示緊今年小米MIX　Fold3用嘅龍骨轉軸。

　　通常愈多口水戰,就證明呢個行頭競爭愈激烈,車企就成日「呠來呠去」,今日就輪到手機商「嘟來嘟去」。對於華為嘅不點名批評,小米方面今日就喺微博反擊,話余承東無風起浪係與事實嚴重不符,強調龍骨轉軸係小米自研嘅全新一代折疊轉軸,首創3級桿組結構,無論點都同華為雙旋水滴鉸鏈完全唔同,請余承東「遵循『科學與嚴謹』的基本規則,勿再抹黑同行」。

　　近期都愈來愈多手機商出疊機,最出名當然就係三叔2019年第一次出嘅Galaxy　Fold,隨後各大手機商都跟著推出,至今都就快5年時間。但係呢5年入面都唔算好帶起到熱潮,因為一部閒閒哋八、九千起跳,入場門檻高之餘,普遍意見都覺得摺mon唔襟用,好脆弱,甚至網上有用家用咗兩個月就壞,mon中間摺痕個位仲會黑咗。

　　雖然唔算特別hit,但係人有我都要有,唔出就會變out,比起賣唔賣得,更重要係技術嘅展示,話畀孖屐聽創新嘅能力。不過與其不斷創新,不如研發到一部襟用嘅仲好,而家電話愈來愈貴,但就愈來愈容易壞,雖然對電話公司係好事,不過身為消費者就好懷念以前Nokia掟極唔難嘅3310,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。