《小傳日記》神州各地大派算力券,不過用唔到幾多轉?

　　《小傳日記》借道指大升,魚缸今日大升400幾點,雖然上返20天線,不過大升市下成交都唔過千億,氣氛唔夠熱烈,可能好快又要散band!

　　升市要靠科技股,一個地方嘅經濟都要靠科技公司。貴州省最新就宣布將會每年派發8000萬人仔嘅「算力券」,話係作為一種政策工具和數字化憑證,用來支持省內外企業、高等學院以及科研機構等等購買貴州算力服務嘅一定比例服務費用。

　　「算力券」其實就係類似消費券,就係一啲可以當錢使嘅quota,不過一定係要用於幫襯AI服務。不過算力券並唔係全國通行,每個省市都可以分別推出自己嘅算力券,算係每個地

方政府推行嘅個別措施,今次就貴州省省政府出嘅算力券,要幫襯位於貴州省內嘅AI服務公司先可以用。

　　算力券其實係今年年初先第一次推出,而第一個發放算力券嘅地方就係成都。今年1月成都推出《成都市圍繞超算智算加速算力產業發展的政策措施》,其中提到成都政府將會每年發放總額唔超過1000萬人仔嘅算力券。當時成都市政府人員解釋,算力券係成都市政府針對算力資源消費免費發放嘅權益憑證,將會以政府補貼方式幫助中小微企使用算力嘅創新舉措。對於申報使用AI方案成功嘅專案主導企業或者機構,可以依照算力成本三成申領總額並且唔超過300萬人仔或150萬人仔嘅算力券。

　　不過如果以成都算力券咁計,每次機構最多只可以申請三成,最多300萬人仔,而總額只係得1000萬,即係如果有三個1000萬AI　project,就已經差唔多攞曬全部算力券,整體真係唔算好多quota。就咁睇,同生仔派兩萬差唔多,算係一種鼓勵,不過推唔推動到就難講,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。