《小傳日記》吉利高層暗串BYD請打手,其實都係為自己吹奏?

　　《小傳日記》車業都算係目前神州競爭最大嘅行業,雖然係咁,但係仍然有唔少大小公司趕住去分一杯羹。正因為競爭愈來愈激烈,車企都少不免明爭暗鬥:「明爭」就係用數字說話,賣到幾多架車就係贏嗰個;「暗鬥」就自然係用口水花說話。

　　繼之前小鵬(09868)反駁理想(02015)每星期公布嘅銷售數字唔準之後,連龍頭吉利(00175)同BYD(01211)都要打口水戰。近期吉利母企吉利控股集團資深副總裁楊學良就喺自己微博發文,話之前喺微博嘅BYD超話(超級話題,即係類似同好群組)入面,某一個都係吹奏BYD嘅post入面,留意到下面留CM嘅人都有啲「古怪」,普遍都只有一個關注,幾十個粉絲,而且都從來無自己出過post,但係睇落都係人自己寫,唔似係AI寫出來。

　　言下之意即係暗串BYD請打手唱好自己。後來楊學良就再補飛,話知道自己身份來點出呢點會比較敏感,但身為一個微博資深用戶,深受呢種生態困擾,反問「廣大網民真的會信這樣的評論嗎?我們的品牌需要這樣一邊倒的溢美之詞嗎?」

　　如果係真,都難怪BYD要養打手來吹奏自己,事實係關於BYD嘅黑材料都係數之不盡。

　　講白啲間間都總有打手,不過緊要就係打手得來會唔會畀人知道,今次啲留言咁明顯,都難怪會被吉利瞅到。不過調轉頭諗,楊學良又會專登去睇BYD嘅群組,都好難唔令人覺得係有意為之,可能其實就係故意入去捉打手出來貼堂,然後乘機瘀吓對手,即係其實搞完一輪都係吹奏返自己,咁就打和啦,Super!請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。