《小傳日記》再搞拳賽鍾培生,竟然諗到馬車對龍心!

　　《小傳日記》有錢就容易身痕。早幾個月馬斯克又有新諗頭,由佢呢位新任Twitter(已改名X)老闆對決Facebook老闆朱克伯格,舉行一場MMA,將會實況轉播,仲話決鬥嘅收入將會捐退伍軍人慈善機構咁講。當被挑機嘅朱克伯格接受挑戰之後,身為先撩者嘅馬斯克似乎就想縮沙,結果就被朱克伯格串佢態度唔認真,如果要打不如同真係有水準嘅人打,睇怕FB對Twitter大戰都應該凍過水。

　　講起打拳鍾培生就認真得多,有心又有金。繼兩年前「林鍾一戰」,鍾培生今年就再搞多次《培生擂台無敵盃2023》,定喺12月1號舉行。8月頭已經公布將會由前微辣成員霍哥對戰周永恆,嗰時記者會上兩位都已經忍唔住出咗手,雖然有交戲嫌疑,不過畫面精彩就花生照食啦。以為鍾培生都好難搵到有咩「兼覓」嘅對手,點知竟然畀佢搵到由龍心對劉馬車!

　　眾所周知龍心同劉馬車兩個都係本地最言行出位嘅網紅,一見到佢哋大名都會係一場混亂,而今次鍾培生竟然可以拉埋呢兩個人來打返場,比起霍哥對周永恆真係更有睇頭。數返舊史,龍

心同劉馬車以前都不時隔空互片,今次兩人終於由線上打到線下,口水戰都終於打到入肉。早兩日舉行嘅記者會上,兩對比賽對手都有現身,比起上次「打定先」戲碼,今次就安份好多,竟然應該更加會忍唔住手嘅龍心同馬車,今次竟然「乖乖哋」影吓相算數,可能本身呢兩位都夠曬睇頭啦,反而令人更加期待真打嘅畫面!

　　有錢使得鬼推磨,有報道就講霍哥係收七位數,而周永恆係收六位數來接受挑戰,不過今次就無公布龍心同馬車收幾錢來打。但係點計都好,最賺嘅一定係鍾培生。兩年前嗰次拳賽,原來

埋單勁賺八位數,成為香港史上最高收益嘅體育節目。當時票價介乎1280銀至28800銀,都成功沽清所有門票,甚至要將預留畀明星藝人同記者嘅飛都賣埋,就知呢場比賽有熱度亦有「錢」路。時隔兩年再搞,睇怕鍾培生都係食過返尋味,唔知今次又有無咁好搵呢?請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。